Աշնանը՝ հոկտեմբերին Գյումրին նոր քաղաքապետ է ընտրելու։ Քաղաքական ուժերը չեն շտապում թեկնածուների անուններ հրապարակել, սակայն համացանցում արդեն ուրվագծվում է պոտենցիալ թեկնածուների անունները։
Շրջանառվող տեղեկությունների համաձայն իշխող «Իմ քայլը» խմբակցությունը քննարկում է Գյումրիի քաղաքապետի մի քանի թեկնածուի տարբերակներ։ Նրանցից մեկը «Քաղաքացիական պայմանագիր» կուսակցության խմբակցության քարտուղարի թեկնածու, գյումրեցի Նազենի Բաղդասարյանն է, քննարկվում է նաև պատգամավոր Կարեն Սարուխանյանի թեկնածությունը։ ՔՊ-ից առաջադրվելու համար կուսակցության հետ բանակցում է նաև գյումրեցի «Իմ Գյումրի» քաղաքացիական նախաձեռնության ղեկավար Արտյոմ Թումանյանը։ Տարբերակներից մեկն էլ համարվում է ՔՊ-ի կողմից Սամվել Բալասանյանի առաջադրումը, քանի որ օրերս Գյումրիում լրագրողների հետ զրույցում ՀՀ Տարածքային կառավարման և ենթակառուցվածքների նախարարի պաշտոնակատար Սուրեն Պապիկյանն ասել էր, որ շատ գոհ է Բալասանյանի աշխատանքից, դժգոհություններ չունի, բայց չէր հաստատել տեղեկությունը, որ կառաջադրեն հենց նրա թեկնածությունը քաղաքապետի պաշտոնի համար։
Արտյոմ Թումանյանը «Առաջին լրատվական»-ի հետ զրույցում ասաց, որ այո, իր անունը շրջանառվում է, բայց ինքը դեռ իր դիրքորոշումը վերջնական չի հստակեցրել.«Ճիշտ է, վերջնական որոշումը կայացնում է Քաղաքացիական պայմանագիրը, բայց եթե ես առաջադրվեմ էլ, միայն Քաղաղացիական պայմանագրի կողմից։ Հստակ քննարկում չի եղել, հարցը դրան չի հասել, քանի որ երկրում ավելի կարևոր բաներ են եղել, իրադարձություններ են եղել, բայց հիմա, ոնց հասկանում եմ, իմ առաջադրվելը հանրային պահանջ է»,-ասաց Թումանյանը։
Մեր զրուցակիցը բացառեց, որ իշխանությունը կարող է Բալասանյանին առաջադրել։ Նա ասաց, որ դա ճիշտ որոշում չի լինի, քանի որ գյումրեցին ճիշտ չի հասկանա դա.«Ես այդ մարդու դեմ ոչինչ չունեմ, բայց ժողովուրդը շատ լավ հիշում է մի քանի կուսակցություն փոխելու հանգամանքը, վերջին դեպքերը մարդիկ լավ հիշում են, երբ վարչապետը եկավ Գյումրի։ Նա ոչ դիմավորեց, ոչ ներկա էր։ Բացի դա այս ընտրություններին ամբողջ քաղաքապետարանի աշխատակազմն աշխատել է Ռոբերտ Քոչարյանի համար որպես վստահված անձ, կամ հանձնաժողովական։ Ժողովուրդը այս ամենից շատ լավ տեղյակ է ու չեմ կարծում, որ ժողովուրդը կընդունի կամ կհասկանա Բալասանյանի առաջադրումը»,-ասաց Արտյոմ Թումանյանը։
Ինչ վերաբերում է Նազելի Բաղդասարյանի առաջադրմանը, ապա նրա առաջադրումն էլ Թումանյանը բացառեց՝ պնդելով, որ անձամբ Նազելի Բաղդասարյանն է իրեն ասել, որ չի առաջադրվելու։ «Նա խմբակցության քարտուղարի աշխատանքներն է կատարում։ Բացառված է, որ առաջադրվի։ Ինքն է անձամբ ինձ ասել դրա մասին»,-ասաց Թումանյանը։
Իշխանական ուժից բացի քաղաքական որոշ ուժեր ևս հետաքրքրված են Գյումրու քաղաքապետի ընտրություններով։ Խիստ նախնական տեղեկություններով ՀՀԿ-ն պատրաստվում է քաղաքապետի պաշտոնի համար առաջադրել Մարտուն Գրիգորյանին, Քոչարյանի ղեկավարած դաշինքը առաաջդրելու է Ռուբեն Մխիթարյանին, որը հումորիստ է և հայտնի է իր հակաիշխանական հայացքներով։
Նախընտրական եռուզեռ Գյումրիում դեռևս չկա։ Կրքերը լարվում են համացանցում, սոցհարցումներ են հրապարակվում, կայքերում նկարներ են դրվում քվեարկության և այլն։ Արձակուրդային շրջանից հետո՝ սեպտեմբերից արդեն նախընտրական կրքերը կթեժանան։ Համենայնդեպս Սուրեն Պապիկյանը հետաքրքիր տեղական ինքնակառավարման ընտրություններ է խոստացել։
