Արդեն հայտնի է, որ «Հայաստան» և «Պատիվ ունեմ» դաշինքները վերցնելու են պատգամավորական մանդատները, իսկ նոր խորհրդարանի առաջին նիստը կկայանա օգոստոսի 2-ին: Ամենաինտրիգային հարցը նոր խորհրդարանում լինելու է այն, թե է լինելու ԱԺ ընդդիմադիր փոխխոսնակը և որ հանձնաժողովներն են բաժին հասնելու ընդդիմությանը: Արդյոք իշխանության համար կա՞ն ռիսկեր հանձնաժողովների բաշխման հարցում:
Հիշեցնենք, որ ԱԺ-ում այսօր կա 11 հանձնաժողով, որոնց նախագահների պաշտոնները իշխանության և ընդդիմադիր խմբակցությունների միջև բաշխվում է Դոնթի բանաձևով: Ըստ այդմ, 71 մանդատ ստացած ՔՊ-ն սկզբում ընտրում է 2 հանձնաժողով, ապա 1 հանձնաժողով ընտրելու իրավունք է ստանում «Հայաստան» դաշինքը, ապա ևս 2 հանձնաժողով՝ իշխանությունը, մեկը՝ «Հայաստան»-ը, մինչև կբաշխվեն ԱԺ 11 հանձնաժողովները։ Այսինքն՝ 11-ից 3-ը բաժին կհասնի «Հայաստանին», «Պատիվ ունեմ»-ը հանձնաժողովի նախագահի պաշտոն չի ստանա։
Հատկանշական է, որ իշխանական խմբակցությունը նախապատվությունը տալիս է առանցքային հանձնաժողովներին՝ պետաիրավական, պաշտպանության և անվտանգության, ֆինանսաբյուջետային, արտաքին հարաբերությունների: Սակայն երկու հանձնաժողով ընտրելուց հետո հանձնաժողովն ընտրելու իրավունքը «Հայաստան» դաշինքինն է:
Այս խնդրի առնչությամբ «Առաջին լրատվական»-ը զրուցեց ՀՔԱ Վանաձորի գրասենյակի ժողովրդավարական ինստիտուտների մոնիթորինգի և զեկուցման համակարգող Վարդինե Գրիգորյանի հետ, ով նշեց. «Իրականում հանձնաժողովները ձևավորվում են Ազգային ժողովի նիստի ժամանակ, քննարկվում էին տարբերակներ, որ փոփոխվեն հանձնաժողովները, այսինքն հնարավոր է չկրկնվեն այն հանձնաժողովները, որոնք հիմա կան: Հնարավոր է հանձնաժողովները փոխեն իրենց ուղղությունները, կամ վերախմբավորվեն, որովհետև որոշ հանձնաժողովներ շատ ծանրաբեռնված են, մյուսները ոչ այնքան: Նաև որոշ դեպքերում հանձնաժողովները գործադիրի հետ այնքան էլ չեն համապատասխանում, ինչը բարդացնում է աշխատանքը»:
Վարդինե Գրիգորյանի խոսքով, Սահմանադրությամբ նախատեսված է, որ ԱԺ-ն կարող է ունենալ մինչև 12 հանձնաժողով. «Այսինքն այս պահին մենք չենք կարող ելնել նրանից, թե հիմա ԱԺ-ում քանի հանձնաժողով կա և ինչ ուղղություններ ունեն դրանք: Դրա համար ենթադրել, թե որ հանձնաժողովների ղեկավարները կլինեն ընդդիմությունից, որինը՝ իշխանությունից, չենք կարող ասել: Բնականաբար, իշխող ուժը կունենա հանձնաժողովների մեծամասնությունը, բայց նաև ընդդիմությունը կկարողանա որոշ հանձնաժողովների նախագահների պաշտոններ ունենալ: Ընդդիմությունը նաև կունենա նաև ԱԺ փոխխոսնակի մեկ պաշտոն»:
ՀԿ ներկայացուցիչը կարծիք հայտնեց, որ շատ հավանական է, որ նոր խորհրդարանում հանձնաժողովների թիվը կլինի այնքան, որքան նախատեսվում է Սահմանադրությամբ, այսինքն 12: «Օրինակ, քաղհասարակությունը բարձրացնում է հարցը, որ Էթիկայի հանձնաժողովը լինի մշտական գործող, սակայն դրա համար պետք է օրենսդրական փոփոխություններ արվեն ԱԺ Կանոնակարգ օրենքում: Մեզ համար կարևոր է, որ լինի էթիկայի հանձնաժողով, որովհետև ոչ մի երաշխիք չկա, որ չի լինի նույն իրավիճակը, որը ունենք 2018-ից հետո, երբ փաստացի ոչ մի դեպքով չձևավորվեց էթիկայի հանձնաժողով:
Ստացվում է, որ էթիկայի հանձնաժողով կարող է ձևավորել միայն իշխող ուժը՝ քանակի առումով, բայց իշխող ուժը խուսափում է հանձնաժողով ձևավորել, երբ դա վերաբերում է իր պատգամավորներին և հանգիստ կարող է ձևավորել, երբ խոսքն ընդդիմության մասին է»:
Անդրադառնալով նրան, որ ընդդիմության ներկայացուցիչները հայտարարում են, որ ռադիկալ ընդդիմություն են լինելու ԱԺ-ում, արդյոք դա լարվածություն չի առաջացնի՞ խորհրդարանի աշխատանքում, Վարդինե Գրիգորյանն ասաց. «Ես ԱԺ-ում ոչ ռադիկալ ընդդիմություն չեմ տեսել՝ անկախ նրանից հայտարարել ե, թե ոչ: Նույն ԲՀԿ-ն ժամանակին հրաժարվում էր ընդդիմություն կոչվելուց, բայց բավականին ռադիկալ էր ԱԺ-ում: Ես չգիտեմ, թե նորերի ռադիկալիզմն ինչով է արտահայտվելու, բայց ես չեմ հիշում, որ եղել է մի ժամանակ, երբ շատ հանգիստ են եղել հարաբերությունները իշխանության և ընդդիմության միջև: