Հաշվեքննիչ պալատի նախագահ Լևոն Յոլյանը հայցադիմում է ներկայացրել դատարան ընդդեմ ՀՀ փաստաբանների պալատի փաստաբան Հակոբ Ջհանգիրյանի՝ պատվին և արժանապատվությանը պատճառված վնասի հատուցման պահանջի մասին: Այս մասին տեղեկանում ենք DataLex դատական տեղեկատվական համակարգից։ Ըստ դատական գործի նյութերի, ՀՀ փաստաբանների պալատի փաստաբան Հակոբ Ջհանգիրյանը մամուլում «հայտնել է Երևան քաղաքի առաջին ատյանի ընդհանուր իրավասության դատարանի դատավոր Վահե Միսակյանի կողմից կայացված որոշումը, որով բավարարվել է ՀՀ հաշվեքննիչ պալատի Իրավաբանական վարչության պետ Արամ Մամիկոնյանի բողոքը: Ըստ փաստաբանի՝ իրենք դիմել էին հետաքննության մարմնին` նշելով, որ Մամիկոնյանը շուրջ տասնմեկ տարի է զբաղեցնում է ՀՀ հաշվեքննիչ պալատի Իրավաբանական վարչության պետի պաշտոնը, սակայն ՀՀ հաշվեքննիչ պալատի նախագահ Լևոն Յոլյանի նախաձեռնությամբ վարչությունն անօրինական կերպով լուծարվել է, ինչը բողոքարկվել է դատարան: Յոլյանի հանձնարարությամբ ստեղծվել է հանձնաժողով, որը գույքագրում է կատարել Մամիկոնյանի աշխատասենյակում և քանի որ Մամիկոնյանն իր աշխատասենյակում ունեցել է անձնական նամակագրություն, գույք և այլ արժեքավոր իրեր, ուստի Յոլյանի գործողություններում առկա են ՀՀ քրեական օրենսգրքի 146-րդ հոդվածի 2-րդ մասով ամրագրված հանցակազմի հատկանիշներ: Նշենք, որ Լևոն Յոլյանի գործողություններում կարող են առկա լինել նաև ՀՀ քրեական օրենսգրքի 177-րդ և 322-րդ հոդվածներով նախատեսված հանցակազմերի հատկանիշներ:
ՀՀ ոստիկանությունում կայացվել էր քրեական գործ հարուցելը մերժելու մասին որոշում, սակայն դատավոր Վ. Միսակյանի կողմից 22.04.2020թ. այդ որոշումը վերացվել է: Այժմ, փաստաբանի փոխանցմամբ՝ դատարանի որոշմամբ պետք է քրեական գործ հարուցվի ՀՀ հաշվեքննիչ պալատի նախագահի նկատմամբ: Հակոբ Ջհանգիրյանի այս հայտարարությունը Լևոն Յոլյանը դիտարկել է իբրև զրպարտություն և դատի է տվել վերջինիս:
Երևան քաղաքի ընդհանուր իրավասության դատարանը, դատավոր Լիլիթ Սարգսյանի նախագահությամբ, հունիսի 30-ի վճռում նշում է, որ «Նյութերի նախապատրաստման արդյունքում վարույթն իրականացնող մարմինը ՀՀ քրեական դատավարության օրենսգրքի 35-րդ 1-ին մասի 2-րդ կետի հիմքով 2019 թվականի հոկտեմբերի 19-ին կայացրել է «Քրեական գործ հարուցելը մերժելու մասին» որոշումը: Հիշյալ որոշման դեմ Արամ Մամիկոնյանի ներկայացուցիչ, փաստաբան Ջհանգիրյանը բողոք է ներկայացրել ՀՀ գլխավոր դատախազին, որը քննարկման նպատակով 2019 թվսկանի նոյեմբերի 15-ին ստացվել է Երևան քաղաքի Արաբկիր և Քանաքեռ-Զեյթուն վարչական շրջանների դատախազությունում: Երևան քաղաքի Արաբկիր և Քանաքեռ-Զեյթուն վարչական շրջանների դատարախազի՝ 2019 թվականի նոյեմբերի 21-ի որոշմամբ ներկայացված բողոքը մերժվել է: Վարույթն իրականացնող մարմնի և Երևան քաղաքի Արաբկիր և Քանաքեռ-Քեյթուն վարչական շրջանների դատախազի որոշումները Արամ Մամիկոնյանի ներկայացուցիչ Հակոբ Ջհանգիրյանի կողմից բողոքարկվել են Երևան քաղաքի առաջին ատյանի ընդհանուր իրավասության դատալան, որի՝ 2020 թվականի ապրիլի 22-ի որոշմամբ ներկայացված բողոքը բավարարվել է, իսկ վարույթն իրականացնող մարմնի՝ 2019 թվականի հոկտեմբերի 19-ի որոշումը վերացվել: Երևան քաղաքի ատյանի ընդհանուր իրավասության դատարանի՝ 2020 թվականի ապրիլի 22-ի որոշումը բողոքարկվել է ՀՀ վերաքննիչ քրեական դատարան, որի՝ 2020 թվականի հուլիսի 19-ի որոշմամբ ներկայացված բողոքը մերժվել է: ՀՀ վերաքննիչ քրեական դատարանի հիշյալ որոշման դեմ ՀՀ գլխավոր դատախազի տեղակալի կողմից ներկայացվել է վճռաբեկ բողոք, որի ընդունումը ՀՀ վճռաբեկ դատարանի՝ 2020 թվականի նոյեմբերի 10-ի որոշմամբ մերժվել է:
ՀՀ դատախազության Արաբկիր և Քանաքեռ-Զեյթուն վարչական շրջանների դատախազ Ղազինյանի 2020 թվականի նոյեմբերի 30-ի որոշմամբ վերացվել է քրեական գործ հարուցելը մերժելու մասին որոշումը և փաստի առթիվ ՀՀ քրեական օրենսգրքի 146 հոդվածի 1-ին մասով հարուցվել է թիվ 14202820 քրեական գործը:
2020 թվականի դեկտեմբերի 01-ին հիշյալ քրեական գործն ստացվել է Արաբկիր վարչական շրջանի քննչական բաժնում և նույն օրն ընդունվել է վարույթ: Նկատի ունենալով, որ ՀՀ քրեական օրենսգրքով չթույլատրված արարքով Արամ Սուրենի Մամիկոնյանին անմիջականորեն պատճառվել է բարոյական վնաս, ուստի ղեկավարվելով ՀՀ քրեական դատավարության օրենսգրքի 58-րդ հոդվածի պահանջներով, որոշել է՝ սույն քրեական գործով Արամ Սուրենի Մամիկոնյանին ճանաչել որպես տուժող:
Վերը նշված փաստերի հաշվառմամբ դատարանը, Ջհանգիրյանի կողմից կատարված արտահայտությունները մեկնաբանելով ամբողջական համատեքստում, գտել է, որ վերջինիս ընդամենը փաստացի տվյալներ է հայտնել քրեական դատավարության կարգով քննվող գործի հանգամանքների վերաբերյալ և որպես Արամ Մամիկոնյանի ներկայացուցիչ փաստաբան կատարել է գնահատողական դատաղություններ առ այն, որ Երևան քաղաքի առաջին ատյանի ընդհանուր իրավասության դատարանի 22.04.2020թ. որոշման պայմաններում պետք է քրեական գործ հարուցվի, ընդ որում գործով հետազոտված ապացույցների հիման վրա հաստատվել է նաև այն փաստը, որ ՀՀ դատախազության Արաբկիր և Քանաքեռ-Զեյթուն վարչական շրջանների դատախազ Բ.Ղազինյանի 30.11.2020թ. որոշմամբ վերացվել է քրեական գործ հարուցելը մերժելու մասին որոշումը և փաստի առթիվ ՀՀ քրեկան օրենսգրքի 146-րդ հոդվածի 1-ին մասով հարուցվել է թիվ 14202820 քրեական գործը, իսկ Արամ Մամիկոնյանը ճանաչվել է տուժող:
Նշված հիմքերով, Երևան քաղաքի ընդհանուր իրավասության դատարանն ամբողջությամբ մերժել է Լևոն Յոլյանի հայցն ու նրանից հօգուտ Հակոբ Ջհանգիրյանի 250.000 ՀՀ դրամ գումար է բռնագանձել` որպես փաստաբանի խելամիտ վարձատրության գումար:
Հիշեցնենք, որ «Առաջին լրատվական»-ը բազմիցս անդրադարձել է Լևոն Յոլյանին առնչվող քրեական և կոռուպցիոն զանազան պատմություններին, իսկ ՀՀ Ազգային ժողովի պատգամավոր Արման Բաբաջանյանի հաղորդման հիման վրա քրեական գործ է հարուցվել ՀՀ հատուկ քննչական ծառայությունում, սակայն Լևոն Յոլյանն անհասկանալիորեն շարունակում է պաշտոնավարել որպես Հայաստանի Հանրապետության հաշվեքննիչ պալատի նախագահ:
Լուսանկարը՝ Armeniasputnik-ի
