Մի քանի օր է վարորդները դժգոհում են գազալցակայաններում հեղուկ գազի թանկացումից։ Հեղուկ գազը 180 դրամից դարձել է 200-210 դրամ։
«Ավտոգազ» ասոցիացիայի նախագահ Մկրտիչ Տիգրանյանը «Առաջին լրատվական»-ի հետ զրույցում ասաց, որ հեղուկ գազի թանկացումը մտահոգիչ չէ։ Շուկա է, կարող է 10-20 դրամի թանկացում լինի, բայց դա անհանգստացնող չէ։ «Թանկացման պատճառներն ավելի ճիշտ է ներմուծողներից հարցնել, բայց դե շուկա է, մի օր թանկանում է, մի օր՝ էժանանում։ Դա բնական է։ Բա վարորդները մի օր ինչի չեն բարձրաձայնում, որ էժանանում է շուկայում հեղուկ գազը։
Գների բարձրացումն ու իջեցումը շատ հաճախ է լինում։ Ասեմ, որ սրանից առաջ 200 դրամ էր, հետո իջավ դարձավ 180։ Հիմա նորից 200-210 է, բայց դա նորմալ է։ Վարորդներն էլ սիրում են բողոքել, ինչ ասեմ»,-ասաց Տիգրանյանը։
Մեր զրուցակիցն ասաց, որ տեղյակ չէ՝ ներմուծման հետ կապված խնդիրներ կան, թե ոչ, բայց ճանապարհները բաց են, հեղուկ գազ ներկրվում է և պետք է որ թանկացումն այդ հանգամանքով պամանավորված չլինի։
Տնտեսական մրցակցության պաշտպանության պետական հնաձնաժողովից «Առաջին լրատվական»-ին փոխանցեցին, որ այդ ոլորտում, իրենց տվյալների համաձայն, չկան գերիշխող դիրք ունեցող ընկերություններ։ Լրացուցիչ տեղեկատվություններ ունենալու դեպքում՝ կտեղեկացնեն։
Մկրտիչ Տիգրանյանը դեմ է, որ որևէ պետական կառույց, ՏՄՊՊՀ-ն սկսի վերահսկողությու սահմանի այս շուկայի վրա.«Սա մասնավոր բիզնես է, պետությունը ինչ վերահսկի։ Գի՞նը։ Պետությունը իրավասություն չունի գին սահմանի, որ դրանից ավել չթանկանա։ Այս շուակում մոնոպոլիաներ չկան։
Ազատ շուկա է, ով ինչքան ուզում, բերում է և ինչքանով, ինչ գնով ուզում է՝ վաճառում է։ Վերահսկման կամ կարգավորման անհրաժեշտություն չկա։
Ինչքան պետության մասնակցությունը քիչ լինի, այնքան այդ բիզնեսը կծաղկի։ Ամեն ինչ նորմալ է, շուկան ինքն իրեն կզարգանա։ Ոնց էր զատիկին ձուն դարձել 150 դրամ, բայց հիմա 60 դրամ է չէ։ Այնպես էլ այս ոլորտն է։ Պետք չէ պատմություն սարքել»,-եզրափակեց Տիգրանյանը։
Մրցակցության պաշտպանության հանձնաժողովը (ՄՊՀ) գների վերահսկողություն իրականացնում է միայն այդ դեպքում, երբ ապրանքային շուկայում կա(ն) գերիշխող դիրք ունեցող տնտեսվարող սուբյեկտ(ներ) կամ առկա է հակամրցակցային համաձայնություն: Հեղուկ գազի շուկան մրցակցային է և ունի ցածր կենտրոնացվածություն: Ոլորտում գործունեություն են ծավալում ավելի քան 50 տնտեսվարող սուբյեկտ, որտեղ, ըստ նախնական ուսումնասիրությունների, չկան գերիշխող դիրք ունեցող ընկերություններ, ուստի նշված ընկերությունները չեն կարող որոշիչ ազդեցություն ունենալ վերոգրյալ ոլորտի ընդհանուր պայմանների, այդ թվում՝ գների վրա: Ինչ վերաբերում է հակամրցակցային համաձայնություններին, ապա դրանք բնորոշ չեն ցածր կենտրոնացվածություն ունեցող շուկաներին:
