Հայաստանում այս տարի սակավաջրություն է, օրերս Տարածքային կառավարման և ենթակառուցվածքների նախարարի պաշտոնակատար Սուրեն Պապիկյանն էլ նշել էր, որ գետերի ջրատվությունը մոտ 80 տոկոսով պակասել է և այս փուլում ջրի խնդիր ունեն ոչ միայն ոռոգելի տարածքները, այլ նաև այն տարածքները, որոնք նախկինում ոռոգելի չեն եղել:
Այս ֆոնին մամուլը գրում է, որ իշխանությունները ստուգում են ՀԷԿ-երի օգտակար գործողության գործակիցը, պարզելու համար, թե որոշակի ծավալի ջրի օգտագործման արդյունքում ինչքան էներգիա է ստեղծվում և որքանով է օգտակար ջրի օգտագործումն այդ կոնտեքստում։
Ընդ որում, նշվում է, որ առաջին հերթին ուսումնասիրվում են այն ՀԷԿ-երը, որոնք այս կամ այն կերպ ասոցացվում են «նախկին» իշխանությունների ներկայացուցիչների կամ նրանց մերձավորների հետ։
Այս առնչությամբ, Փոքր ՀԷԿ-երի ասոցիացիայի նախագահ Նաիրա Նահապետյանը «Առաջին լրատվական»-ի հետ զրույցում նշեց, որ ինքը որևէ տեղեկություն չունի ստուգումների մասին. «Ես տեղեկություն չունեմ, որ ստուգումներ են սկսվել, իսկ մեր հէկ-ը կանգնած է մայիսի 10-ից: Պատճառը ոռոգման ջուրն է: Ոռոգումը սկսվում է, մենք կանգնում ենք: Այս տարի աննախադեպ շոգերի հետ կապված ավելի շուտ է սկսվել ոռոգման շրջանը: Ջրի քանակի պակասը զգացվեց շոգերի, կլիմայական պայմանների հետ կապված»:
Նա հավելեց, որ այս տարի ոռոգման սեզոնը առնվազն Շիրակի դաշտավայրում սկսվել է մայիսից. «Մինչ այդ որևէ ստուգում չի եղել»:
