ԶՊՄԿ-ի ձերբակալվածները, ստուգումները, առհասարակ Սյունիքի համայնքապետերի հետ կապված գործընթացը ոչ մի պարագայում չի կարելի քաղաքականացնել։ Իրավական գործընթաց է գնում, քննությունը ամեն ինչ կպարզի»,-«Առաջին լրատվական»-ի հետ զրույցում ասաց ՀԺԿ քարտուղար, մեղրեցի Գրիգոր Հարությունյանը։
Վերջինիս տեղեկություններով՝ այսօր արդեն կոմբինատի աշխատանքները պետք է վերսկսվեին, բայց դրանից զատ էլ մասնագետները պնդում են, որ թեև կոմբինատը չի աշխատել, բայց պղնձի ու մոլիբդենի կոնցենտրատի պաշարներ եղել են և դա անընդհատ տեղափոխվել է դեպի Երևան։ «Այսինքն նորմալ գործընթաց է գնում։ Պետք չէ պատմություն սարքել։ Ասում են, որ արդեն 30-31 մարդ աշխատանքից ազատվել է։ Ուրեմն մի բան եղել է, որ ստուգումներ են սկսվել։ Հենց այնպես չէր կարող ստուգում լինել։ Պետք չէ գործընթացը քաղաքականացնել։ Քննչական մարմինները նայում են, ուսումնասիրում են։ Հիմա պետք չէ ենթադրություններ անել։ Դա անշնորհակալ գործ է։ Ամեն բան քննությունը կպարզի»,-ասաց Հարությունյանը՝ ավելացնելով.«Նույնը վերաբերում է համայնքապետերի գործերին։ Կրկնում եմ, պետք չէ գործընթացը քաղաքականացնել։ Թող սպասեն, կստուգեն, կվերջացնեն, նոր այդ ժամանակ հնարավոր կլինի կարծիք հայտնել։ Գործընթացը բնական է, թե համայնքապետերի հետ կապված, թե կոմբինատի հետ կապված։ Սա բացարձակապես չպետք է դառնա շահարկումների առարկա։ Որոշ համայնքապետերի հետ կապված քրեական գործեր կային մինչև այս ընտրությունները՝ դեռևս 2018 թվականից։ Այնպես որ բնական գործընթաց է»,-ասաց Հարությունյանը։
Մեր զրուցակցի խոսքով՝ ԶՊՄԿ-ի ստուգումները, համայնքապետերի ձերբակալությունները Սյունիքում տրամադրություններ չեն փոխել։ Մարդիկ շատ նորմալ են վերաբերում այդ զարգացումներին. «Սյունիքում կրքեր չկան։ Ժողովուրդը մշտապես նախկին իշխանություններից դժգոհ է եղել։ Իսկ այդ ձերբակալվածները դերակատարություն են ունեցել և նախկին ընտրությունների ժամանակ, և հիմա։ Հիմա ես չեմ կարծում, որ տեղի ունեցող պրոցեսը քաղաքական հետապնդում է։ Այսօր մենք Հայաստանում հաստատ քաղաքական բանտարկյալ չունենք։ Դա 100 տոկոս։ Համբերություն է պետք։ Զինվենք համբերությամբ և սպասենք քննության, դատավարությունների ավարտին»,-եզրափակեց Գրիգոր Հարությունյանը։
