Այսօր՝ հուլիսի 19-ին Բաթումիում հանդիպելու են Եվրամիության, Ուկրաինայի, Մոլդովայի ու Վրաստանի նախագահները:
Այդ կապակցությամբ Վրաստանի նախագահ Սալոմե Զուրաբիշվիլին Թվիթերի իր էջում գրել է․ «Ուրախ եմ Բաթումիի միջազգային համաժողովում ողջունելու Եվրոպական խորհրդի, Ուկրաինայի և Մոլդովայի նախագահներին»։
Ակնկալվում է, որ Շառլ Միշելի, Վլադիմիր Զելենսկու, Մայա Սանդուի ու Սալոմե Զուրաբիշվիլիի հանդիպմանը քննարկվելու է ասոցացման համաձայնագիրը ստորագրած Ուկրաինայի, Վրաստանի, Մոլդովայի հետ Եվրամիության համագործակցության մակարդակը բարձրացնելու հարցերը։
Վրաստանի հարցերով փորձագետ Ջոնի Մելիքյանի կարծիքով՝ Վրաստանն այսօր ցույց է տալիս, որ չի փոխում իր արտաքին քաղաքականությունը և պատրաստում է Եվրամիությանն անդամակցության հայտը․ «Դրա համար բոլոր այսպիսի հանդիպումներն ու քննարկումները Վրաստանի համար շատ կարևոր է։ Այլ հարց է, որ այս ամենը զուգակցվում է Վրաստանի ներքաղաքական ճգնաժամի հետ։ Ասեմ, որ Մոլդովա, Ուկրաինա, Վրաստան եռյակը մի ֆորմատ է, որը փորձ է արվում ներկայացնել որպես առաջատար, բայց հստակ աշխատող ֆորմատը Արևելյան գործընկերության ֆորմատն է և որի շրջանակներում աշխատանքներ են տարվում։Մնացածը զուտ սիմվոլիկ բնույթ է կրում»,-«Առաջին լրատվական»-ի հետ զրույցում ասաց նա։
Մեր զրուցակիցը նաև ընդգծեց, որ այս հանդիպումն ինչ-որ տեղ հնարավորություն է տալիս ռեսթարթ անել վրաց-ուկրաինական հարաբերությունները, որոնք Սաակաշվիլու պատճառով ճգնաժամային էին։ «Կհիշեք նաև, որ դեսպանն էր հետ կանչվել։Թբիլիսին վերջին ամիսներին կարողացավ դիվանագիտական գործընթաց ապահովել, որի շրջանակներում վրաց-ուկրաինական հարաբերություններում կարողացան ռեստարտ ապահովել ։ Եվ այսօր մենք տեսնում ենք, որ այս ֆորմատի քայլերից մեկը նման կոնֆերանսին մասնակցությունն է։ Բայց եթե մենք բովանդակության մասին ենք խոսում, ապա Արևելյան գործընկերության ամեն պետություն ունի իր ճանապարհային քարտեզը, խնդիրները, բարեփոխումների փաթեթը, որը պետք է ապահովել։ Իսկ քանի որ այդ երեք երկրները ստորագրել են Ասոցացման համաձայնագիրը տնտեսական բաղադրիչի հետ մասին, այդ ամենը պետք է դիտարկել այդ ընդհանուր գործընթացների շրջանակներում։ Իրենք ցույց են տալիս, որ ունեն ստորագրած այս փաստաթղթերը, ցույց են տալիս նաև, որ իրենց ցանկությունն ավելին է, քան այսօր կա և այդ ուղղությամբ փորձում են աշխատանք տանել՝ եվրոպական ուղղությամբ շարժվելու համար․։
Ջոնի Մելիքյանի խոսքերով՝ Շառլ Միշելի տարածաշրջանային այցը ևս շատ կարևոր է․«Եվրամիությունը կոնկրետ իր մոտեցումները ներկայացրեց մեր հարցի շուրջ։ Վրաստանում այցի հիմնական հատվածը վերաբերում էր ներքաղաքական ճգնաժամին։ Եթե հիշենք, որ նախկին այցի շրջանակներում նախապատրաստվեց ու դրանից հետո Շառլ Միշելի ներկայությամբ ստորագրվեց ապրիլի 15-ի համաձայնագիրը՝ Վրաստանի իշխանությունների ու ընդդիմության միջև, ինչ- որ չափով կարող ենք ասել, որ այն ժամանակ այդ ճգնաժամային փուլն ավարտվեց։ Բայց այսօր մենք տեսնում ենք, որ ներքաղաքական զարգացումներում նոր իրավիճակ է և Շառլ Միշելի այցն ու միջնորդությունը կարևոր է՝ ներքաղաքական այս պրոցեսները հանդարտեցնելու համար»։
Մեր այն հարցին՝ ինչո՞վ է պայմանավորված այն հանգամանքը, որ Եվրամիությունը Հայաստանին ավելի շատ օգնություն է հատկացնելու, քան Վրաստանին, մեր զրուցակիցը պատասխանեց․ «Մենք այստեղ պետք է հստակ անջատենք այն գրանտները, որոնք այդ փաթեթի շրջանակներում են տրվում և վարկերը։Այստեղ հստակ նշված է, որ կան ծրագրեր, որի համար այդ վարկերը տրամադրվում են։ Թե ինչ տոկոսներով՝ դա արդեն կարող ենք ճշտել փոխվարչապետի գրասենյակից։ Բայց իմ կարծիքով՝ նաև տարածաշրջանային վերջին գործընթացները ևս իրենց ազդեցությունն են ունեցել։ Մի կողմից Եվրամիությունը փորձում է այս բարդ իրավիճակում Հայաստանին աջակցել, իսկ մյուս կողմից՝ հույս ունեն, որ Երևանը արտաքին քաղաքականության մեջ հստակ այլ քայլերի կարող է գնալ։ Գուցե այս ամենից կան որոշակի սպասումներ»։