Ռուսաստանում օրենսդրական նախագիծ է մշակվում, որով ԶԼՄ-ներին կարգելվի հղում կատարել Telegram-յան ալիքներով տրված տեղեկատվությանը և լուրերին։ Նախատեսվում է օրենքն ընդունել մինչև պետական դումայի ընտրությունները։
Նկատենք, որ պատերազմից հետո Հայաստանում ևս սկսեցին մտմտալ նման մի օրենսդրական նախաձեռնության շուրջ, համանման նախագիծ անգամ մշակվեց, սակայն չընդունվեց ու քննադատվեց ԶԼՄ-ների խնդիրներով զբաղվող փորձագետների կողմից։
Ինֆորմացիայի ազատության կենտրոնի ղեկավար Շուշան Դոյդոյանն «Առաջին լրատվական»-ի հետ զրույցում անդրադառնալով ՌԴ-ում նման նախաձեռնությանը նկատեց, որ ՌԴ-ի համար դա նորմալ է, հասկանալի է, բայց շատ վտանգավոր կլինի, եթե հանկարծ մեր իշխանությունը որոշի կրկնօրինակել այդ նախաձեռնությունը.«Որևէ երկրում նման կարգավորման անհրաժեշտություն չեմ տեսնում։ Մամուլն ինքն է որոշում ինչին հղում անել, ինչին՝ ոչ։ Աղբյուրների ընտրությունը դա միայն մամուլի լիազորությունների շրջանակնում է։ Պետությունը այդտեղ որևէ սահմանափակման, միջամտության կարիք չունի։ Հակառակ դեպքում դա կարող է դիտվել որպես անհամաչափ միջամտություն արտահայտվելու ազատությանը և մամուլի աղբյուրների գաղտնիության պաշտպանության իրավունքին։ Այնպես որ հուսով եմ մեր պատգամավորները այնքնա խելամիտ կլինեն, որ ՌԴ նման կարգավորումները չեն արտատպի մեր իրականություն»,-ասաց Դոյդոյանը։
Մեր դիտարկմանը՝ հատկապես պատերազմից հետո մենք տեսանք, թե շատ հաճախ Telegram-յան ալիքներով տրված հիմնականում տեղեկատվությանը ինչ ազդեցություն էր ունենում, ինչ հետևանքներ էր առաջացնում և անգամ այս պարագայում նմանկարգավորման անհրաշեշտություն չկա՞, Դոյդոյանը պատասխանեց.«Անգամ այդ պարագայում նման կարգավորման կարիք չկա, որովեհտև շատ հաճախ հենց Telegram-յան ալիքներն էին ճշմարտության մասին տեղեկացնում հանրությանը, երբ պետությունը ճշմարտությունը քաքցնում էր հասարակությունից։ Չեմ ասում՝ դա լավ է, թե վատ, բայց դա տեղեկատվության աղբյուր էր։ Իսկ ընդհանրապես սկզբունքն այն է, որ մամուլի, լրատվամիջոցների աղբյուրների պաշտպանության իրավունքին պետությունը չի կարող միջամտել։ դա միայն կարող է պարտադրվել դատարանի որոշմամբ՝ այն էլ ծանր, առանձնապես ծանր հանցագործություններ կանխելու նպատակով։ Այնպես որ դա վտանգավոր նախաձեռնություն եմ համարում, բայց հասկանալի է, որ դա Ռուսաստանում է լինում»,-ասաց Դոյդոյանը՝ ևս ավելացնելով, որ համանման նախաձեռնություն պատերազմից հետո նախաձեռնվեց մեր պատգամավորների կողմից, բայց հույս հայտնեց, որ դա կյանքի չի կոչվի։ «Դա կլինի անհարկի, ոչ համաչափ միջամտություն մամուլի գործունեությանը»,-եզրափակեց մեր զրուցակիցը։
