Նախօրեին Ազգային ժողովրդավարական բևեռի խորհրդի անդամ Ժիրայր Սեֆիլյանը հանդես է եկել հայտարարությամբ, որտեղ նշել է, որ Սասնա Ծռերի ապստամբությամբ սկսված ազատագրական գործընթացը ժողովուրդն իր ձեռքից բաց թողեց, հետևանքով 4 տարի անց եղավ արհավիրք․ ունեցանք հազարավոր զոհեր և Հայրենիքի տարածքից մեզ համար շատ մեծ կորուստ։
Նա նաեւ նշել է. «Պետք է հասկանանք, որ նախորդ անգամվա համեմատությամբ շատ բան է փոխվել։ Համակարգն էապես թուլացել է և քայքայման ընթացքի մեջ է։ Եվ, որ եթե նախորդ անգամ համաժողովրդական ընդվզման հասունացման համար անհրաժեշտ եղավ 2 տարի, ապա այս անգամ դա լինելու է ընդամենը ամիսների ընթացքում։
Ուստի պատրաստվենք ընդվզելու, հրապարակները լցնելու և քաղաքացիական անհնազանդության միջոցով կեղեքիչ համակարգին ժողովրդի կամքը պարտադրելու, որպեսզի վերջապես ձևավորենք ազգային կառավարություն և սկսենք կառուցել անվտանգ, արժանապատիվ ու բարեկեցիկ ազգային պետություն»:
Այս առնչությամբ ԱԺԲ վարչապետի թեկնածու Վահե Գասպարյանը «Առաջին լրատվական»-ի հետ զրույցում հաստատեց Սեֆիլյանի խոսքը՝ նշելով. «Ես միշտ կրկնել եմ և կրկնում եմ, որ հաշված ամիսներ անց Առաջին հանրապետությունը վերածնվելու է»:
Հարցին, թե ինչ հաշվարկի հիման վրա են եկել այդպիսի եզրակացության, նա պատասխանեց. «Խորը քաղաքագիտական հաշվարկների հիման վրա»:
Դիտարկմանը, որ եթե նպատակը Նիկոլ Փաշինյանին չեզոքացնելն է, եւ եթե ապստամբելու ցանկություն կա, ինչու չեն միանում ՀՅԴ-ին, որը նույնպես հայտարարում է փողոցային պայքարը շարունակելու մասին, Վահե Գասպարյանն ասաց. «Ես միանում եմ այն ուժերին, որոնք աշխատում են, իրենց քայլերը ձեռնարկում են Հայաստանի ու հայ ժողովրդի ազգային շահերի հիման վրա: Մենք մեր քայլերը կատարում ենք Հայաստանի և հայ ժողովրդի ազգային շահերից ելնելով, մենք ազգային ուժ ենք»: