Միավորված ազգերի կազմակերպության հայաստանյան գրասենյակի դիմաց քաղաքացի Գագիկ Սարգսյանը 3 օր է, ինչ հացադուլ է հայտարարել: Սակայն այս օրերի ընթացքում ո՛չ իշխանությունը, ո՛չ ՄԱԿ-ի գրասենյակը նրան ուշադրության չեն արժանացրել: Նա դիմում է հղել նախագահ Սերժ Սարգսյանին, որում մասնավորապես նշված է. «2005 թվականի նոյեմբերի 9-ից բանդիտական զինված հարձակմամբ ինձ ապօրինի վտարել են Ամիրյան 4/18 հասցեում գտնվող իմ սեփական բնակարանից, որի մի հատվածը ես օգտագործում եմ որպես կրպակ: Ինձ վտարել են առանց փոխհատուցման, առանց սպասելու ընթացող դատական գործի ավարտին: Անգամ իրերս տեղափոխելու հնարավորություն չեմ ունեցել: Տարել կամ ոչնչացրել են իմ ողջ ունեցվածքը, այդ թվում` բարձրագույն կրթության դիպլոմն ու աշխատանքային գրքույկս: Ինձ սեփականազրկելու ողջ գործընթացը ապօրինի գործողությունների մի ամբողջ շարան է, ինչին հասնելու համար օգտագործել են խարդախ ճանապարհով իմ անշարժ գույքի սեփականության վկայականի կրկօրինակը և առանց որևէ օրինական ուժի մեջ մտած դատավճռի` ինձ զրկել են սեփականությունից: Արդեն 5 տարի է, ինչ ես բառիս բուն իմաստով անօթևան եմ, չունեմ եկամտի ոչ մի աղբյուր, նպաստ չեմ ստանում, հասցե չունեմ և զրկված եմ աշխատանք գտնելու որևէ հնարավորությունից»: