Վրաստանում կորոնավիրուսային համավարակի սկզբից ի վեր COVID-19 է ախտորոշվել մոտ 41 հազար երեխայի մոտ, ինչը վարակվածների ընդհանուր թվի 9-10%-ն է կազմում: Այս մասին հայտարարել է Իաշվիլիի մանկական կենտրոնական հիվանդանոցի բժշկական տնօրեն Իվանե Չխաիձեն: Հաղորդում է Jnews.ge-ն։
Վերջինիս տվյալներով, ներկայումս հիվանդանոցների մանկաբուժական բաժանմունքներում հիվանդատեղերն ամբողջությամբ զբաղված են: Ինչ վերաբերում է երեխաների հիվանդության ծանրությանը, Չխաիձեի խոսքով, երկու տարեկանից ցածր ցանկացած վարակված երեխա մեծ ռիսկի է ենթարկվում:
«Նորածնի տարիքը արդեն ռիսկի գործոն է համարվում»,- ասել է նա:
Նա պարզաբանել է, որ Delta շտամի դեպքում հիվանդների մոտ հաճախ դիտարկվում է թոքերի վնասում: Այնուամենայնիվ, նորածինների համար սիմպտոմատիկ բուժումը և մեխանիկական օդափոխությունն անարդյունավետ են, որոնք օգնում են մեծահասակների բուժման դեպքում մեծամասնությանը:
«Ամեն ինչ կախված է օրգանիզմի դիմադրողականությունից: Նորածինների մոտ դիմադրողականությունը շատ ցածր է, իմունային համակարգը նվազագույնին մոտ է, այնպես որ նորածինների օրգանիզմի պաշտպանությունը ցածր է»,-հայտարարել է Չխաիձեն:
Ուրբաթ օրը Վրաստանում առաջին անգամ գրանցվել էր կորոնավիրուսով հիվանդ նորածնի մահ: Հինգ օրվա ընթացքում նրան տեղափոխել էին Ի. Ցիցիշվիլիի անվան Թբիլիսիի մանկական հիվանդանոց: Բժիշկները երկու շաբաթից ավելի պայքարում էին նորածնի կյանքի համար:
Այժմ ծայրահեղ ծանր վիճակում գտնվող եւս երկու նորածիններ մնում են Ցիցիշվիլիի անվան մանկական կլինիկայում: Նրանցից մեկի մոտ ախտորոշվել է Delta շտամը: Նա հիվանդանոց է բերվել Աբխազիայից:
