Քաղաքագետ Էմիլ Օրդուխանյանը ֆեյսբուքյան իր էջում գրել է․
Հայաստանի ժողովրդավարական զարգացման հեռանկարին, Արցախյան հարցում ԵԱՀԿ Մինսկի խմբի եռանախագահության ձևաչափի վերագործարկմանը, Հայաստանի արտաքին քաղաքականության տարբերակմանը և հավասարակշռմանը դիմադրողները, ըստ էության, գործում են ՀՀ-ի՝ որպես ինքնիշխան պետության կազմալուծման օգտին, քանի որ հիշատակված դրույթներն այսօր՝ առավելապես հետպատերազմյան իրավիճակում, ուղղակի առաջնահերթություններ են պետության ներքին և արտաքին անվտանգության ապահովման իմաստով: Հայ-ադրբեջանական սահմանին ադրբեջանական խարդավանքներն ու սադրանքները ուղղված են այդ առաջնահերթությունների իրագործման չեզոքացմանը: Նրանք շտապում են ապակայունացնել վիճակը, քանի որ ԵՄ-ի արդեն բազմիցս հայտարարված ֆինանսական ներդրումները (2.6 մլրդ եվրո ծավալով) Հայաստանի ռազմավարական նշանակության ոլորտներում հակասում են նրանց ծրագրերին. թշնամուն պետք է թույլ և աշխարհի կողմից լքված Հայաստան: Հետևապես՝ այդ ներդրումների գործնականացումը և այդ հարցում Հայաստանի առավելագույնս արագ դրական արձագանքը լավագույն հնարավորությունն է Հայաստանում կայունություն հաստատելու և թշնամու ծրագրերը ձախողելու համար:
