Արևելյան գործընկերության շրջանակում Հայաստանը Հարավային Կովկասում Եվրամիության կողմից ամենալայնածավալ աջակցությունը ստացած երկիրն է՝ այս մասին Եվրոպական հանձնաժողովի հարևանության և ընդլայնման հարցերով հանձնակատար Օլիվեր Վարհեիի հետ կայացած հանդիպումից հետո հայտարարել է փոխվարչապետի պաշտոնակատար Մհեր Գրիգորյանը։
Եվրամիությունը առաջիկա 5 տարիների համար Հայաստանին հատկացվելիք 1,6 միլիարդ եվրոն այլ աղբյուրներով կավելացնի 1 միլիարդով՝ ընդհանուր ներդրումային փաթեթը դարձնելով 2,6 մլրդ եվրո։ Ներդրումային փաթեթի ծավալով Հայաստանը առաջ է անցնում Ուկրաինայից՝ 1,94 մլրդ և Մոլդովայից՝ 1,63 մլրդ եվրո փաթեթով։ Ամենաքիչ աջակցությունը կտրվի Ադրբեջանին՝ 140 մլն եվրո։ Ֆինանսական օժանդակության նպատակը համատեղ մշակված ներդրումային և տնտեսական նախագծերի իրականացումն է:
Մոտ ապագայում Եվրամիությունը նաև 9-10 մլն եվրոյի մարդասիրական օգնություն կտրամադրի Լեռնային Ղարաբաղի հակամարտությունից տուժած անձանց՝ ասել է հանձնակատարը։ Բացի այդ Եվրամիությունը պատրաստ է աջակցել Ադրբեջանին և Հայաստանին տարածաշրջանում երկարաժամկետ խաղաղություն հաստատելու հարցում։ Օլիվեր Վարհեին այս մասին խոսել էր Բաքվում, վերահաստատել նաև Երևանում։
Հայաստանի Եվրոպական կուսակցության նախագահ Տիգրան Խզմալյանի կարծիքով՝ սա ուղերձ է և ապացույց, որ Եվրամիությունը, արևմուտքն ամբողջությամբ աջակցում է Հայաստանի ինքնիշխանությանը․<Այդ մասին բազմիցս ուղերձներ եղել են։ Եղել են դեսպանների այցելությունները Սյունիք, եղել է Միացյալ Նահանգների դեսպանի այցելությունը, Սև լիճ այցելություն ռազմական կցորդների կողմից։ Մեր թերահավատ ժողովուրդը ուզում էր անպայման տեսնել նյութական ու շոշափելի ապացույց, ահա եկավ նաև այդ ապացույցը։ Կարևոր է ոչ թե գումարը, այլ հատկապես կարևոր է այն միջոցների ու նպատակների ցուցակը, որոնք նշված են այդ դրամաշնորհի մեջ։ Դա Սյունիքի պաշտպանվածությունն է, Հյուսիս-Հարավ ճանապարհը։ Եթե միայն այդ երկու կետերը վերցնենք, ապա հասկանալի է, թե որն է աշխարհաքաղաքական իմաստը։ Հայաստանը դառնում է արևմտյան մեծ նախագծի առանցքային մասը>,-<Առաջին լրատվական>-ի հետ զրույցում ասաց նա։
Մեր զրուցակիցն ընդգծեց՝ միանվագ այսպիսի աջակցություն ընտրություններից երկու շաբաթ անց, իհարկե քաղաքական ուղերձ, որը պետք է ընկալվի․<Սխալ կլինի չտեսնել դրա կապը արտախորհրդարանական մի քիչ տարօրինակ թվացող ձևաչափի հետ, որովհետև դրանով ապահովում է երկրում ժողովրդավարական գործընթացը, որն ընդհատվեց ընտրություններով։Ընտրություններում փաստորեն կառուցողական ընդդիմություն չձևավորվեց, ձևավորվեց կոշտ հակապետական և ռուսամետ մի դաշտ, որը մտավ խորհրդարան ու դրանով կառավարությունը կորցրեց ճկունություն, որն անհրաժեշտ է արտաքին քաղաքականության մեջ։ Ահա թե ինչին է աջակցում Եվրամիությունն ու արևմուտքը։Եթե շատ կարճ՝ Հայաստանը դառնում է արևմտյան քաղաքականության կարևոր բաղկացուցիչ մաս և մեր թեզն առ այն, որ Հայաստանը Եվրոպա է, ստանում է ոչ միայն վերացական, խորհրդանշական, այլ շատ շոշափելի ու ուղիղ իմաստ>։
Խոսելով Հայաստանի անելիքների մասին, մեր զրուցակիցն ասց․<Արևմուտքը միայն չէ և այլևս գումարները չեն տրվում առանց վերահսկողության։Մենք ուշադրություն դարձրեցինք, թե ովքեր են կապալարուները, այնտեղ կորեական, իրանական ընկերություններ կան։ Վերահսկողությունը ապահովում է Եվրամիության հատուկ խումբը։ Այս ամենը նշանակում է, որ Հայաստանին տրված է հնարավորություն, բայց այդ հնարավորությունը փակ աչքերով չի տրված։ Լինելու է վերահսկողություն, որպեսզի հակաժողովրդավարական ուժերը չփորձեն ևս մեկ անգամ հասնել ռևանշի։ Հայաստանն ունի շատ կարճ ժամանակ և եվրաինտեգրացման այլընտրանքը նոր պատերազմն է, եթե մենք մնանք ռուս-թուրքական դաշինքի կազմում>։