Գործարար Ռուբեն Վարդանյանը 3 մլրդ դոլարանոց Հայաստանի զարգացման հիմնադրամ է առաջարկում ստեղծել և ներկայացնում է Հայաստանի զարգացման 12 քայլ, այն է՝ համաձայնության գալ Հայաստանի զարգացման սոցիալ-տնտեսական մոդելի շուրջ, ակտիվ ներգրավել երիտասարդներին (25-35+) երկրի կյանքում, քանի որ Հայաստանի ապագան նրանցն է, վերանայել կանանց դերը մեր հասարակության մեջ և հնարավորություն տալ նրանց ակտիվ մասնակցել հասարակական կյանքին, նաև ստեղծել 250 մլն դոլարանոց հիմնադրամ՝ աջակցելու և զարգացնելու հայոց լեզուն և Հայաստանի մշակութային ու հոգևոր ժառանգությունը, բարեփոխել կրթության և առողջապահության ամբողջ համակարգը և այլն:
Մինչ Նիկոլ Փաշինյանն այս օրերին տարբեր ներղրողների հետ է հանդիպում, Ռուբեն Վարդանյանը իր առաջարկների իրականացումը կարծես թե կառավարությունից անկախ է պատկերացնում: Որքանո՞վ է նրա առաջարկած 12 կետն իրատեսական, և որքանով այն խոսքից գործ դառնալու հնարավորություն ունի: Քաղաքական վերլուծաբան Ռուբեն Մեհրաբյանը նշում է, որ սրանով Ռուբեն Վարդանյանը նոր բան է առաջարկում. «Եթե մարդը հանդես է գալիս գաղափարով՝ ստեղծել 3 մլրդ դոլարանոց հիմնադրամ, և դրանով իր նպաստը բերել Հայաստանի զարգացմանը, կարծում եմ՝ դրա մեջ միայն գովելի բան կա: Սա եթե ընդհանուր ենք նայում, մնացածը պարզ կլինի դետալները տեսնելուց հետո»,- «Առաջին լրատվական»-ի հետ զրույցում նշեց Մեհրաբյանը:
Իսկ թե ինչու ՀՀ կառավարության հետ չեն քննարկում, չկա փոխգործակցություն, Մեհրաբյանի համար հասկանալի չի. «Եթե առաջարկ է արվում Հայաստանի զարգացման վերաբերյալ և խոսքը ահռելի դրամագլխով հիմնադրամի մասին է, ես չեմ կարծում, որ Ռուբեն Վարդանյանը որևէ խոչընդոտ ունի Հայաստանի իշխանության հետ հանդիպելու: Թեկուզ վերջին մեկ շաբաթվա ընթացքում մենք տեսանք բազմաթիվ գործարարների հետ ՀՀ վարչապետը հանդիպում է, և չեմ կարծում, Ռուբեն Վարդանյանի կողմից ցանկության դեպքում որևէ խոչընդոտ այդ առումով կարող է լինել: Ես չգիտեմ՝ ցանկություն կա, թե չկա: Բայց կարծում եմ, որ նման մասշտաբի ծրագրով հանդես գալով, իհարկե, այլ կերպ քան համագործակցաբար Հայաստանի կառավարության հետ, դժվար կլինի այդ ծրագիրը կյանքի կոչել: Այո՜, լավ ծրագիր է, և չեմ կարծում, որ նման ծրագրի հաջողության պարագայում որևէ բանական իշխանություն դրան դեմ կլինի»,-ասաց նա:
Դիտարկմանը, որ այս տարի «Ավրորա» մրցանակաբաշխությունը Վենետիկում են կազմակերպում, մինչդեռ շատերը նշում են, որ հիմա, երբ Հայաստանը պատերազմից հետո այսքան խոցելի է, ճիշտ կլիներ Սյունիքում անցկացնել նման միջոցառումները, Մեհրաբյանը նշեց, որ Ավրորա նախաձեռնությունը ունի կազմ կոմիտե, որն էլ որոշում է, թե որտեղ ինչ պետք է անի:
« Եթե կազմակերպիչներին այդպես ավելի նպատակահարմար է թվացել, ապա ինչպես ասում են՝ կանաչ ճանապարհ, ոչ մեկն իրավունք չունի որևէ առարկությամբ հանդես գալ: Ի վերջո, այդ փայլուն նախաձեռնությունը կապված է Հայաստանի հետ, հայ ժողովրդի հետ: Որևէ խնդիր չեմ տեսնում, որ մի անգամ էլ այլ վայրում, ասենք, Վենետիկում այդ մրցանակաբաշխությունը կատարվի: Ես հասկանում եմ՝ մարդիկ ինչի վրա են հիմնվում նման քննադատությամբ հանդես գալով, բայց ես չեմ կարծում, թե դա ճիշտ է: Այս ամեն ինչի հիմնավորումներով, պարզաբանումներով ինքը՝ Ռուբեն Վարդանյանը չեմ կարծում թե խոչընդոտ ունի Հայաստանի հանրության հետ հաղորդակցվելու համար»:
Լուսանկարը՝ Armeniasputnik-ի
