«Առաջին լրատվական»-ի հարցերին պատասխանել է ՌԱԿ Լիբանանի շրջանային վարչության ատենապետ դոկտ. Ավետիս Դաքեսյանը
Լիբանանի վարչապետը հրաժարական է տվել: Երկրում առկա իրավիճակն ինչպե՞ս եք գնահատում այս փուլում, ի՞նչ ակնկալիքներ կան, արդյոք հրաժարականները հարցի լուծում են:
Սա մի քիչ անակնկալ էր բոլորի համար, որովհետև հիմա լրիվ մնացինք մթության մեջ, մտանք փակուղի: Հիմա, երբ վարչապետը հրաժարական տվեց, երկրի նախագահը բոլոր պատգամավորներին նորից պետք է կանչի և նոր վարչապետի անուն ներկայացնի: Այս զարգացումը անսպասելի էր և անհասկանալի իրավիճակ է ստեղծվել: Պատահական չէ, որ դոլարի փոխարժեքը կտրուկ բարձրացավ այդ անորոշության ֆոնին: Մարդիկ երեք օր ճանապարհները փակեցին, անիվներ այրեցին, եթե այսպես շարունակվի, ժողովուրդը սովի է մատնվելու: Բոլորը սպասում են, թե ինչ է լինելու առաջիկա օրերին: Բավական մթագնեց հորիզոնը: Ես, որ 35 տարի ապրում եմ Լիբանանում, երբեք այսպիսի ծանր ու լուրջ ճգնաժամ չէի տեսել: Առաջիկա մի քանի օրերի ընթացքում տեսնենք, թե ում անունը կներկայացնեն որպես վարչապետ:
Պարոն Դաքեսյան, Հայաստանից ի՞նչ ակնկալիքներ ունեն լիբանանահայերը:
Որքան որ ճգնաժամը խորանա այստեղ, կացությունը դժվարանա, բոլոր լիբանանահայերի աչքը սևեռվել է Հայաստանի վրա: Բոլորն ուզում են տեղափոխվել Հայաստան, բայց տնտեսական դժվարությունների առջև են: Գիտեք, որ բանկերում ունեցած փողերը չեն տալիս: Եթե մարդիկ մի քիչ կարողություն ունենան ճամփորդելու, ուղիղ գալու են Հայաստան: Բարեբախտաբար, Հայաստանում ընտրություններից հետո կարծես իրավիճակը խաղաղվում է, բնականոն կյանքի են վերադառնում: Մարդիկ այդ համոզումը ունեն, որ Հայաստանը կամաց-կամաց լավանալու է և լիբանանահայերը կտեղափոխվեն Հայաստան: Ուրիշ ո՞ւր պետք է գնան: Հեռավոր Ամերիկա չեն գնալու:
Փաստորեն լիբանանահայերը գումարներ ունեն բանկերում, որոնք չեն կարողանում հանել, որ կարողանան Հայաստան գա՞լ:
Այո, մեծ մասը այդ վիճակում է, բայց բոլորի աչքը սևեռած է Հայաստանի վրա: Եթե պետք է այստեղից գաղթեն, պիտի գան Հայաստան, ուրիշ տեղ չունեն գնալու: Այլ տեղերում շատ ավելի դժվար է լինելու, գոնե Երևանում մի կերպ յոլա կգնան: Բայց սպասում են, որ դոլարի փոխարժեքը մի քիչ կայունանա: Գնալով բարձրանում է, մարդիկ հուսալքված են: Շատ դժվար, ծանր հանգրվան է, տեսնենք, թե ոնց ենք այդ հանգրվանը շրջանցելու: