Եվրագավաթների խաղարկությանը մասնակցող հայկական չորս ակումբներից երկուսը հաղթահարեցին որակավորման առաջին փուլը։ Չեմպիոնների լիգայում Հայաստանի չեմպիոն «Ալաշկերտը» պայքարից դուրս թողեց Ուելսի չեմպիոն «Կոնաս Կի Նոմադսին»։ Առաջին խաղում մրցակցի հարկի տակ ոչ-ոքի խաղալուց հետո «Ալաշկերտը» Երևանում, լրացուցիչ ժամանակում առավելության հասավ 1։0 հաշվով։ Հայաստանի գավաթակիր «Արարատը» Հունգարիայում «Ֆեհերվարի» հետ 1։1 խաղալով, Գյումրիում առավելության հասավ 2։0 հաշվով։ Բրոնզե մեդալակիր «Ուրարտուն» երկու հանդիպումներում միևնույն 0։1 հաշվով զիջեց սլովենական «Մարիբորին»։ Եվ վերջապես ՀՀ փոխչեմպիոն «Նոան» ֆիննական «ԿուՊՍ»-ին Երևանում 1։0 հաշվով հաղթելուց հետո պատասխան խաղում ջախջախիչ պարտություն կրեց 5։0 հաշվով։ Ինչպե՞ս գնահատել հայկական թիմերի ելույթները եվրագավաթների որակավորման առաջին փուլում։ 4 թիմերից ամենաուժեղ կազմը ունի «Ալաշկերտը», որը Ուելսի չեմպիոնի հետ հանդիպումից առաջ համալրվել էր ևս 8 ֆուտբոլիստներով։ Հայաստանի չեմպիոնը պարտավոր էր հաղթել կարգով մի քանի անգամ ավելի ցածր մրցակցին և լուծեց խնդիրը։
Այո, «Ալաշկերտից» ակնկալում էինք ավելի արդյունավետ խաղ, բայց․․․։ Եղան տակտիկական որոշակի սխալներ, որոնք կարելի է շտկել։ Պարզագույն օրինակ, պատասխան խաղում «Ալաշկերտին» հաղթանակ պարգևած ֆրանսիացի Վենսան Բեզեկուրը չգիտես ինչու խաղադաշտ դուրս եկավ միայն հանդիպման 111-րդ րոպեին։ Փոխարենը երկրորդ դաշտ մտան Նիկիտա Տանկովը և Գրիգոր Աղեկյանը, որոնք ոչնչով աչքի չընկան։ Մեր չեմպիոնի գլխավոր մարզիչ Ալեքսանդր Գրիգորյանի հիմնական խնդիրը առաջիկա խաղում թիմի ողջ ներուժը օգտագործելն է։ Հիշեցնենք, որ որակավորման երկրորդ փուլում «Ալաշկերտը» մրցելու է Մոդովայի չեմպիոն «Շերիֆի» հետ։ Առաջին հանդիպումը տեղի կունենա հուլիսի 20-ին՝ Երևանում, իսկ պատասխան հանդիպումը՝ հուլիսի 28-ին Տիրասպոլում։ Մեր 4 թիմերից թերևս «Արարատի» ելույթը կարելի է որակել գերազանց։ Երևանյան թիմը ցուցադրեց որակյալ ֆուտբոլ հաղթահարելով կարգով անհամեմատ ավելի բարձր հունգարական «Ֆեհերվարի» արգելքը։ Վարդան Բիչախչյանի թիմն ըստ էության արեց անհնարինը։ Կոնֆերենցիաների գավաթի խաղարկության երկրորդ փուլում Արարատի մրցակիցը կլինի լեհական Վրոցլավ քաղաքի «Շլյոնսկ» ակումբը։ Առաջին փուլում «Շլյոնսկն» ընդհանուր 4։1 (2։0, 2։1) հաշվով հաղթել է էստոնական Պաիդե ակումբին։ Լեհաստանի նախորդ առաջնությունում թիմը չորրորդ տեղն է զբաղեցրել։ Նշենք, որ «Շլյոնսկն» որակապես ավելի թույլ է «Ֆեհերվարից»։ Առաջին հանդիպումը «Արարատը» կանցկացնի հուլիսի 22-ին սեփական հարկի տակ, իսկ պատասխան հանդիպումը հուլիսի 29-ին՝ Լեհաստանում։ «Արարատի» հաղթանակի ֆոնին «Ուրարտուի» ելույթը «Մարիբորի» դեմ կարելի է որակել ոչ բավարար։
Այո, մրցակիցն ավելի ուժեղ էր, բայց․․․։ Ուժեղ էր նաև «Ֆեհերվարը»․․․։ Մեծ հաշվով «Ուրարտուն» պայքարեց մինչև վերջ և վատ չխաղաց, բայց ընդունենք, որ սլովենական թիմին այնուամենայնիվ կարելի էր հաղթել։ Ինչ վերաբերվում է «Նոային», ապա այս թիմի արդյունքը կարելի է գնահատել մեկ բառով՝ հիասթափեցնող։ Մրցաշրջանից հետո թիմի ղեկավարությունը դիմեց արմատական կադրային փոփոխությունների։ Հեռացավ գլխավոր մարզիչը ինչպես նաև առանցքային բազմաթիվ ֆուտբոլիստներ։ Դրա հետևանքով Հայաստանի առաջնությունում կայուն և որակյալ խաղ ցուցադրող թիմի խաղը կտրուկ անկում ապրեց։ Թե ինչով էր պայմանավորված նման որոշումը դժվար է ասել։ Անցյալ տարի «Նոան» Եվրոպա լիգայում որակավորման առաջին փուլում 4։1 հաշվով զիջել էր ղազախական «Կայրաթին» և դուրս էր մնացել հետագա պայքարից։ Կարծում ենք՝ այս արդյունքից հետո եվրագավաթներին կարելի էր ավելի լավ պատրաստված և պատասխանատու մոտենալ, բայց․․․։ Երկրորդ տարին անընդմեջ «Նոան» պարտություն է կրում խոշոր հաշվով և ձախողվում։ Ընդհանուր առմամբ մեր թիմերը Եվրագավաթների առաջին փուլում ցույց տվեցին 50 տոկոսանոց կոնտրաստային արդյունք։
Այն գոհացնող համարել բնականաբար չի կարելի։ Հուսանք, որ պայքարը շարունակող «Ալաշկերտն» ու «Արարատը» կզարգացնեն հաջողությունը։ Եվրոպական մրցասպարեզում ակումբներն առաջին հերթին ներկայացնում են մեր երկիրը և առաջնային խնդիրը Հայաստանի պատիվը բարձր պահելն է։
