Չինաստանը հույս ունի, որ Առողջապահության համաշխարհային կազմակերպության (ԱՀԿ) փորձագետները ավելի շատ ուշադրություն կդարձնեն այն տեսությանը, որ կորոնավիրուսը Ուհան է հասել սառեցված սննդամթերքով, այլ ոչ թե լաբորատորիայից արտահոսքի հետևանքով: Ուրբաթ, հերթական ճեպազրույցում, ՉԺՀ արտաքին գործերի նախարարության պաշտոնական ներկայացուցիչ Չժաո Լիցզանը մեկնաբանել է ԱՀԿ-ի մտադրությունը՝ անցկացնելու կորոնավիրուսի ծագումն ուսումնասիրելու հետազոտության երկրորդ փուլը:
«Չինական կողմը տեղեկություն է ստացել այն մասին, որ գլխավոր տնօրեն Թեդրոս Ադհանոմ Գեբրեյեսուսը և ԱՀԿ-ն մշակել են կորոնավիրուսի ծագման ուսումնասիրության նոր փուլի ծրագիր: Մենք ուսումնասիրում ենք այս փաստաթղթի նախագիծը»,- ասել է նա: «Այս հարցում մեր դիրքորոշումը չի փոխվել. բոլոր կողմերը պետք է հարգեն գիտնականների կարծիքը և չքաղաքականացնեն կորոնավիրուսի ծագման ուսումնասիրությունը»,- հավելել է դիվանագետը:
«Լաբորատորիայից արտահոսքը ծայրաստիճան անհավանական է: Մենք պետք է ավելի խոր ուսումնասիրենք այն դերը, որը կարող էր ունենալ սառը շղթան (սառեցված սնունդը) և այլ տարրեր: Դա պետք է հիմք դառնա կորոնավիրուսի ծագման ուսումնասիրության նոր փուլի համար»,- ասել է Չժաո Լիցզյանը:
Նրա խոսքերով՝ Չինաստանի իշխանությունները թափանցիկ են եղել և փորձագետներին տրամադրել են բոլոր անհրաժեշտ տեղեկությունները: «ԱՀԿ-ի փորձագիտական առաքելության այցի ընթացքում Չինաստանը նրանց տրամադրեց նշված ելակետային տեղեկատվությունը: Փորձագետները բազմիցս նշել են, որ իրենք ստացել են բավարար քանակությամբ տեղեկատվություն և հասկացել են, որ մարդկանց անձնական որոշ տվյալներ հնարավոր չէ պատճենել կամ վերցնել»,- ամփոփել է դիվանագետը:
Ինչպես հայտնել ենք, Առողջապահության համաշխարհային կազմակերպության ղեկավար Թեդրոս Ադհանոմ Գեբրեյեսուսը չի բացառել կորոնավիրուսի արհեստական ծագման հավանականությունը։
