«Առաջին լրատվական»-ի զրուցակիցն է Ապարան ջոկատի հրամանատար Ռազմիկ Պետրոսյանը։
–Պարոն Պետրոսյան, հակառակորդը առաջխաղացման ու դիրքային ամրապնդման աշխատանքներ է կատարել սահմանի Երասխի հատվածում, փոխհրաձգություն է սկսվել, հայկական կողմը զոհ ունի։ Ինչպե՞ս եք գնահատում այս իրավիճակը։
-Ամբողջ խնդիրն այն է, որ այս ամենը մեր ներքին իրավիճակի արդյունքն է։ Հայաստանյան ներքին անկայուն իրավիճակն է Ադրբեջանին իրավունք տալիս նման գործողություններ ձեռնարկել։ Իրենք ուզում են այս անկայուն իրավիճակում ինչ հասցնեն՝ տանեն։ մենք պետք է ուշադիր լինենք։ Կլինեն նման իրավիճակներ էլի և հիմնական պատճառը ներքին անկայուն իրավիճակն է։ Երբ քաղաքական իրավիճակը կայունանա, բանակի ռեֆորմները կարճ ժամանակում իրագործվեն, իրենք այլևս ռիսկ չեն անի նման քայլերի դիմել։ Բայց կրկնում եմ, քանի մեր ներքաղաքական իրավիճակը չի հանդարտվել, մեր «ընդդիմությունը» նման պահվածք է ցույց տալիս, խառնում է ամեն ինչ, դա հակառակորդի համար պարարտ հող է գործողություններ ծավալելու համար, որի արդյունքում մենք մեր երեխեքին ենք կորցնում։ Պետք է կոչ անեմ բոլորին սթափվեն, քաղաքական ապուշ խաղերը դնեն մի կողմ և գոնե առաջիկա 2 տարվա մեջ թույլ տան այս պետությանը ոտքի կանգնել, որ հակառակորդը ռիսկ չանի սահմանին նման շարժեր անի։
–Դուք ասում եք քանի դեռ ներքաղաքական իրավիճակը չի կայունացել, բայց Նիկոլ Փաշինյանը հետընտրական հանրահավաքում հայտարարեց, որ ներքաղաքական ճգնաժամն այլևս հաղթահարված է։
-Այո, ընտրությունները սառը ցնցուղ էր նրանց համար, ովքեր ուզւոմ էին անկայուն վիճակը երկար ձգել, բայց դա չի նշանակում, որ ընտրություններից հետո ամբողջությամբ խնդիրները լուծվել են, որովհետև քանի իրենց ընդդիմութուն հռչակած, բայց իրականում Հայաստանի ներքին վիճակն ապակայունացնող ուժերը դեռ գործելու հնարավորություն ունեն, միշտ այդ վտանգը կա։ Սահմանադրական դատարանում նրանց պահվածքը դրա վառ ապացույցն է։ Ընդդիմութուն կոչվածը իր պահվածքով Ադրբեջանին տալիս է բոլոր հնարավորությունները լարել սահմանին իրավիճակը։ Այնպես չէ, որ այսօր Երասխի հատվածում Ադրբեջանը հաջողություն է ունեցել, բայց ամեն զինվորի կյանք հազարավոր ասկյարի կյանք արժի։ Այլ հարց է, որ մեր ներքին կայուն վիճակը պետք է հակառակորդի համար զսպաշապիկ դառնա, որ ռիսկ չանեն երբևէ սադրանքներ անել մեր սահմանի վրա։
–Պարոն Պետորսյան, Երասխի հատվածում հակառակորդի ակտիվությունը կապվում է Տիգրանակերտի նկատմամբ հակառակորդի ունեցած հավակնություններով։ Դուք ի՞նչ դիտակումներ ունեք։
-Տիգրանակերտի թեմաները, այդ տարածքի թեմաները հիմնականում մեր վայ քաղաքական ընդդիմություն կոչվածն է թմբկահարում։ Ադրբեջանը գերազանց գիտի, որ իրենք Տիգրանակերտը վերաբնակեցնելու հնարավորություն չեն ունենա։ Քանի դեռ Հայաստանի ու Ադրբեջանի միջև թշնամական վիճակ է, չի կարող մեր տարածքում իրենց որևէ քաղաքացի ապրի, կամ Արծվաշենում հայ ապրի։ Մնացածը ժամանակի հարց է։ Երբ մեր մեջ երբևէ նման լուրջ թշնամանք չի լինի, գուցե դա հանարվոր լինի, բայց հիմա դա բացառված է։ Հիմա Ադրբեջանը չի կարող իր առաջ նպատակ դնել Տիգրանակերտը վերցնել և բնակեցնել ադրբեջանցիներով։ Չի կարող նման բան լինել։ Ես համոզված եմ, որ առաջիկայում նոր կառավարության ձևավորմամբ, Ազգային ժողովի նորմալ աշխատանքի դեպքում այս անկայուն վիճակին վերջ կտրվի և նման սահմանային լարումներ էլ չեն լինի։
–Հակառակորդը արդեն 2 ամսից ավել է մեր տարածքում է, չի հեռանում։ Այս հարցը ինչպե՞ս պետք է կարգավորվի, հանգուցալուծվի։
-Նույն կոնտեքստով։ Երբ մեր մոտ ստաբիլ, կայուն վիճակ կլինի, կկարգավորվի նաև սահմանային վիճակը։ Երբ երկրում կայունացում լինի նաև արտաքին խաղացողները հստակ խնդիր կդնեն ու այդ հարցը կլուծվի։ Ես եղել եմ սահմանային այդ հատվածներում, տեսել եմ ամեն ինչ ու համոզված կարող եմ պնդել, որ այդ ամենը մեր ներքաղաքական պրոցեսների հետևանք է։ Եթե ընտրություններից հետո յուրաքանչյուրը հարգեր քաղաքացու քվեն, իր ստացած քվեն ու գնար լուռ ու մունջ ծառայելու պետությանը, հիմա վաղուց արդեն սահմանային այդ իրավիճակը հարթվել էր։
