Վարչապետի պաշտոնակատար Նիկոլ Փաշինյանը հեռախոսազրույց է ունեցել ԱՄՆ պետքարտուղար Էնթոնի Բլինքենի հետ՝ վերջինիս նախաձեռնությամբ:
Ինչպես տեղեկացրին ՀՀ վարչապետի աշխատակազմի տեղեկատվության և հասարակայնության հետ կապերի վարչությունից, ամերիկյան կողմը շնորհավորել է Նիկոլ Փաշինյանին ընտրություններում «Քաղաքացիական պայմանագիր» կուսակցության հաղթանակի առթիվ` ընդգծելով ՀՀ կառավարության կողմից վերջին տարիներին ձեռնարկած հետևողական քայլերը՝ Հայաստանի ժողովրդավարական ձեռքբերումների ապահովման գործում: Այս համատեքստում, ԱՄՆ պետքարտուղարը բարձր է գնահատել Նիկոլ Փաշինյանի գործադրած ջանքերը՝ երկրում նախընտրական շրջանում ստեղծված լարվածությունը խաղաղ ճանապարհով հանգուցալուծելու և ընդդիմության հետ քաղաքակիրթ հարաբերություններ կառուցելու ուղղությամբ:
Վարչապետի պաշտոնակատար Նիկոլ Փաշինյանը շնորհակալություն է հայտնել ժողովրդավարական բարեփոխումների ուղղությամբ Հայաստանի ձեռբերումները գնահատելու համար:
Պետքարտուղարը հավաստիացրել է, որ ԱՄՆ շարունակելու է ջանքեր գործադրել բոլոր գերիների վերադարձն ապահովելու համար: Անդրադառնալով Լեռնային Ղարաբաղի հակամարտության թեմային, պետքարտուղարը հույժ կարևորել է ԵԱՀԿ Մինսկի խմբի համանախագահների գործունեության վերականգնումը՝ ընդգծելով խաղաղ գործընթացի հստակ օրակարգի մշակման անհրաժեշտությունը, որը հնարավորություն կտա գտնել հակամարտության կայուն և երկարաժամկետ լուծում:
Այս համատեքստում Նիկոլ Փաշինյանը ևս շեշտել է, որ հակամարտությունը կարգավորված չէ և պահանջում է համապարփակ լուծում, որին հնարավոր է հասնել բացառապես Մինսկի խմբի համանախագահության շրջանակում:
Ամերիկյան կողմը նշել է, որ համաձայն է վարչապետի պաշտոնակատարի այն դիտարկմանը, որ ստատուս քվոն չի կարող կայուն լինել և ՄԽ համանախագահության համար անհրաժեշտ է հստակ օրակարգ, որը կնպաստի բանակցությունների հաջողությանը:
Քաղաքագետ, «Հանուն Հանրապետության» կուսակցության ղեկավար մարմնի անդամ Ռուբեն Մեհրաբյանի կարծիքով՝ այն փաստը, որ խոսակցությունը տեղի է ունեցել ամերիկյան կողմի նախաձեռնությամբ և դրա առիթն էր շնորհավորելը կայացած ժողովրդավարական ընտրությունների առթիվ, ինքնին կարևոր էր․ «Երկրորդ՝ այն շեշտադրումները, որ մենք տեսանք մամլո հաղորդագրության մեջ շատ կարևոր էինք։ Մասնավորապես այն, որ կա համատեղ կամք՝ երկկողմ հարաբերությունների խորացման հետ կապված։ Չափազանց կարևոր անդրադարձ կա նաև ղարաբաղյան հակամարտության կարգավորման գործընթացի ներկայիս փուլին։ Մանավանդ՝ այս ամենն էլ ավելի է կարևորվում ԱՄՆ դեսպանի Շուշի չգնալուց հետո։ Այն անդրադարձը, որ ամերիկյան կողմը համաձայն է հայկական կողմի այն փաստարկին, որ ներկայիս ստատուս-քվոն կայուն համարվել չի կարող։ Կարելի է հասկանալ, որ հետպատերազմական ստատուս-քվոն չի կարող համարվել որպես հարցի կարգավորում։ Անդրադարձ կատարելով նաև Մինսկի խմբի համանախագահների հստակ օրակարգ ունենալու անհրաժեշտությանը, մենք կարող ենք արձանագրել, որ Երևանն ու Վաշինգտոնը նույն հաճախականության վրա են խոսում և հարցերին նայում են նույնանման, ինչպես նաև նույնանման են գնահատում սպառնալիքներն ու դրանք հաղթահարելու ուղիները»,-«Առաջին լրատվական»-ի հետ զրույցում ասա նա։
Մեհրաբյանի դիտարկմամբ՝ ինչպես և շեշտվում է հաղորդագրության մեջ, ԱՄՆ-ն կարող է գերիների հարցում շարունակել աշխատանք իրականացնել։ Հիշեցնենք, որ ԱՄՆ բարձրաստիճան պաշտոնյայի տարածաշրջան կատարած այցից հետո, ԱՄՆ-ի ու Վրաստանի ջանքերով Հայաստան վերադարձվեց 15 ռազմագերի․ «Միանշանակ աշխատանքը շարունակական կլինի։ Գերիների հարցն ամենակարևոր խոչընդոտներից է ներկա փուլում գործընթացն առաջ տանելու համար։ Այս գնահատականը կիսում են թե՛ Երևանում ու թե՛ Վաշինգտոնում, հետևաբար այդ խոչընդոտը պետք է վերացվի»։
Խոսելով հայ-ամերիկյան հարաբերությունների զարգացման ֆոնին Ռուսաստանի հնարավոր արձագանքի մասին, մեր զրուցակիցը նկատեց․ «Ռուսաստանը որևէ բարոյական իրավունք այլևս չունի Երևանին ինչ-որ բան ասել, երբ նա ձեռնարկի ինչ-որ քայլեր, որոնք բխում են մեր շահերից։ Իսկ Երևանի սրբազան պարտքն է ռուսներին բացատրել դա։ Ռուսները եթե ինչ-որ բանից դժգոհ են, թող ավելի լավ բան առաջարկեն, եթե կարող են։ Եթե չեն կարող, թող մի կերպ համակերպվեն այդ դաժան իրականության հետ»,-եզրափակեց նա։