2022 թ. հունվարի 1-ից գիտաշխատողների բազային աշխատավարձը կբարձրանա։ Վերջին անգամ գիտաշխատողների աշխատավարձը բարձրացել էր 2010 թվականին, որից հետո գիտական աշխատողների աշխատավարձի ֆոնդի վերանայում չէր իրականացվել։
2022 թ. հունվարի 1-ից ՀՀ պետական բյուջեից ֆինանսավորվող գիտական կազմակերպությունների գիտական կադրերի պաշտոնային դրույքաչափի նվազագույն չափի հաշվարկի համար որպես բազային աշխատավարձ սահմանվել է 66 140 դրամը, իսկ արդեն 2025-ին գիտաշխատողը կստանա 276 հազար դրամ, գիտական ստորաբաժանման ղեկավարը՝ 477.200 դրամ, գլխավոր գիտաշխատողի միջին աշխատավարձը կկազմի 553 հազար դրամ:
Պետությունից տրամադրվող բազային աշխատավարձի չափաքանակը 2022-ին կկրկնապատկվի՝ 4-ի փոխարեն հասնելով 7.8 միլիարդ դրամի, 2025-ին կհատկացվի 14.4 մլրդ դրամ:
Նախօրեին գիտաշխատողների աշխատավարձերի բարձրացման և գիտական կադրերի որակավորման անցկացման վերաբերյալ ԳԱԱ նախագահությունում քննարկում է եղել գիտական կազմակերպությունների տնօրենների և ՀՀ կրթության, գիտության, մշակույթի և սպորտի նախարարության գիտության կոմիտեի նախագահ Սարգիս Հայոցյանի և գիտության կոմիտեի նախագահի տեղակալ Արթուր Մովսիսյանի հետ:
ՀՀ ԳԱԱ ակադեմիկոս-քարտուղար Արթուր Իշխանյանը «Առաջին լրատվական»-ի հետ զրույցում նշեց, որ թեև հունվարի մեկից պետք է գիտաշխատողների աշխատավարձերի բարձրացում լինի, սակայն գիտաշխատողների ատեստավորումը պետք է տեղի ունենա մինչև հունվարի մեկը, և հիմա գիտաշխատողները տեղեկանում են ատեստավորման ընթացակարգից։
Արթուր Իշխանյանը նշեց, որ գիտաշխատողները կառավարության որոշումից գոհ են, սակայն ակնկալում են ավելին, որովհետև այս բարձրացումը դեռևս բավարար չէ, չի դարձնում ոլորտը միանգամայն գրավիչ երիտասարդների համար։
44-օրյա պատերազմից հետո պետության առաջնահերթություններից մեկը գիտության զարգացմանն ուղղված քայլերը պետք է լինեին։ Իշխանյանի խոսքով՝ կան անվտանգային խնդիրներ, և կառավարության առաջնահերթություններից մեկը, անշուշտ, պետք է լինի այս ոլորտը։
Հայաստանում մոտավորապես 4000 գիտնական կա, սակայն գիտնականների միջին սերնդի բացը կա․
«Համարյա չունենք միջին սերունդ, մենք ունենք ավագ գիտնականների սերունդ, որոնց միջին տարիքը 65-ից բարձր է այսօր և ունենք երիտասարդներ ոչ մեծ թվով, որոնք չեն մնում գիտության մեջ, հեռանում են»,-ասաց Իշխանյանը։
Եվ հիմա նրանց հետ բերելու քայլեր պետք է իրականացվեն․ «Այս բարձրացման խնդիրը կարևոր է, բայց դեռևս լիովին բավարար չէ, կիսաքայլ է, բայց շատ կարևոր քայլ է այդ ուղղությամբ»,-հավելեց Իշխանյանը։
