Հայաստանի կառավարությունը հուլիսի 12-ին տեղի ունեցած արտահերթ նիստում կայացրել է Հայաստանից պղնձի և մոլիբդենի խտանյութի արտահանման համար մաքսատուրք կիրառելու մասին որոշում: Այդ որոշումը մանրամասնող գրառում էր արել էկոնոմիկայի նախարար Վահան Քերոբյանը, ներկայացնելով դրա պատճառներն ու շարժառիթը: «ա) Հայաստանի Հանրապետության ընդերքը պետական սեփականություն է, բ) միջազգային շուկաներում պղնձի և մոլիբդենի գներն ավելի քան 50%-ով աճել են անցած տարվա միջին գների նկատմամբ, գ) ներկա ռոյալթիների գանձման համակարգը չի ապահովում այսպիսի շահույթների արդար բաշխումը ՀՀ քաղաքացիների ու հանքաարդյունաբերողների միջև, դ) ինչպես նաև այն, որ մեր պետության առջև կան լուրջ մարտահրավերներ, որոնց հնարավոր է դիմագրավել հավելյալ ռեսուրսներով, այսօր ՀՀ Կառավարությունը որոշեց արտահանման լիցենզիոն տուրք կիրառել պղնձի և մոլիբդենի խտանյութերի և որոշ հարակից ապրանքների նկատմամբ, որի արդյունքում արտահանման ծավալների պահպանման դեպքում ՀՀ պետբյուջեն կստանա լրացուցիչ 30-35մլրդ դրամ 2021 թվականի ընթացքում»: Թեմայի շուրջ «Առաջին լրատվական»-ը զրուցել է նախարարի պաշտոնակատար Վահան Քերոբյանի հետ:
Քերոբյանի խոսքով՝ նախկինում ընդերքը կեղեքվում էր, ռոյալթիների համակարգը վերանայվելու է:
Մեզ հետ զրույցում նախարարը նշեց, որ առաջիկա 5 տարվա պլանի մեջ նախագծել են այնպիսի ծրագրեր, որոնք կխթանեն ներդրումների հոսքը:
