Ցուցարարները Ռուսթավելի պողոտայից երթով շարժվել են դեպի «Վրացական երազանք» կուսակցության կենտրոնական գրասենյակ:
Ինչպես հաղորդում է 1tv.ge-ն, ցուցարարների խոսքով՝ իրենց համար անընդունելի է ՆԳՆ կողմից րոպեներ առաջ արված հայտարարությունը՝ կապված օպերատոր Լեքսո Լաշքարավայի մահվան հետ:
Վրացական «TV Pirveli» հեռուստաընկերության օպերատոր Ալեքսանդր Լաշկարավայի մահվան պատճառը կարող էր լինել թմրանյութերի գերդոզավորումը, հայտնել են երկրի ՆԳՆ-ում կայացած ճեպազրույցի ժամանակ:
Հիշեցնենք, որ Թբիլիսիում վարչապետի հրաժարականի պահանջով բողոքի ակցիաներ են։
Կառավարության ղեկավարի հրաժարականի պահանջն առաջացել է այն բանից հետո, երբ հայտնի է դարձել, որ մահացել է հուլիսի 5-ի ակցիային տուժած «TV Pirveli» հեռուստաընկերության օպերատոր Ալեքսանդր Լաշկարավան:
Սկզբում նրան հիվանդանոց են տեղափոխել աչքի վնասվածքով, հետո դուրս են գրել։ Մի քանի օր անց տղամարդուն տանը մահացած է գտել նրա մայրը։