Տևական ժամանակ իր գործունեությունը պասիվացրած հայ-ռուսական բարեկամության «Լազարևյան» ակումբը կրկին հիշեցնում է իր մասին։ Մամուլի ուշադրությունից դուրս է մնացել, որ մոտ մեկ ամիս առաջ, ակումբն իր հերթական նիստն է արել՝ ղարաբաղյան հակամարտության թեմայով։ Հյուրներն էլ Արցախի բարձրաստիճան նախկին պաշտոնյաներն էին՝ նախագահներ Բակո Սահակյանը, Արկադի Ղուկասյանը, բարձրաստիճան այլ գործիչներ ևս։
Նրանց կողքին ուշագրավ էր տեսնել Անդրանիկ Միհրանյանին, ով Հայաստանի և Հայաստանի իշխանությունների մասին վերջին լուտանքներն է թափում ռուսական լրատվամիջոցներում, ռուսական հեռուստաէկրաններին։ Բայց երբ տեսնում ենք, որ ակումբի նիստին է մասնակցել նաև հավերժ թեկնածու Վազգեն Մանուկյանը, ով վերջին անգամ թեկնածու առաջադրվեց մեկ տարով վարչապետ դառնալու համար, բայց հայտնի իրադարձությունների արդյունքում, այդպես էլ չդարձավ, պատկերն ամբողջական է դառնում։
Թե ինչ առնչություն ունեն Արցախի նախկին նախագահներն Անդրանիկ Միհրանյանի հետ, արցախցի իրավապաշտպան, «Հելսինկյան 92» նախաձեռնության արցախյան համակարգող Կարեն Օհանջանյանն ասաց՝ մարդկային հարաբերություններ ունեն։ Հավանաբար նախկին նախագահներ Բակո Սահակյանին ու Արկադի Ղուկասյանին հետաքրքրել է, թե փորձագիտական դաշտում ինչ են մտածում արցախյան խնդրի դեռ չկարգավորված հարցերի մասին։
Մեր զրուցակիցը, սակայն, կարծում է, որ Անդրանիկ Միհրանյանն այնքան էլ լուրջ դեմք չէ, որքան ներկայացվում է մամուլում։ Բացի այդ՝ ըստ Օհանջանյանի, հենց նա է Զատուլինի հետ միասին համոզել նախկին նախագահ Սերժ Սարգսյանին չստորագրել Եվրամիության հետ Ասոցացման համաձայնագիրը և Հայաստանը դարձնել Մաքսային միության, ապա նաև Եվրասիական տնտեսական միության անդամ․ «Արդյունքում՝ եղավ այս պատերազմը և նման սարսափելի հետևանքներ Արցախի համար։ Մենք փաստորեն կորցրեցինք Ղարաբաղը։ Ես համոզված եմ, որ եթե չլիներ Սերժ Սարգսյանի այդ հակահայկական քայլը, մենք նման հետևանքների ականատես չէինք լինի։ Հենց այդ քայլից էլ բխեցին մեր երկրի առաջ ծառացած բոլոր խնդիրները»։
Օհանջանյանը հավելեց․ «Եվ ես հիմա զարմանում եմ այս ամենի վրա։ Մեր մեջ, փաստորեն քաղաքական վերնախավում, մի տղամարդ չկա, որ կանգնի ու ասի՝ Ռուսաստանը մեր թշնամին է, հարյուր տարուց ավել մեզ հալածում է։ Մեր մեջ փաստորեն այդքան տղամարդկություն չկա։ Իսկ ես կարծում եմ, որ մենք Ռուսաստանից պետք է ազատվենք։ Ավելի լավ է՝ էլի մի բան կորցնենք, բայց Ռուսաստանից կախում չունենանք։ Մեզ պետք են դաշնակցային հարաբերություններ և ոչ շարունակվող այսպիսի մի վիճակ՝ ռուսական լծի տակ»,-եզրափակեց նա։
Ի դեպ՝ «Լազարևյան» ակումբի հիշյալ նիստի ժամանակ Սոչիից եկած մի հայրենակից Արցախի նախկին նախագահներին հարց է ուղղել՝ ինչու խրամատներ չէիք փորել, բոլորդ եք մեղավոր կատարվածի համար։Սա հարուցեց Անդրանիկ Միհրանյանի մեծ զայրույթը, ով հորդորեց հարց տվողին «հիմարություններ չասել ու չանել քաղաքական հայտարարություններ»։ Բակո Սահակյանն իր հերթին չհամաձայնելով հարցի բովանդակությանը նկատեց՝ մենք պատրաստ ենք լսել քննադատություններ, բայց ոչ սադրիչ ելույթներ, որոնք իրականության հետ առնչություն չունեն։
