«Առաջին լրատվական»-ի հարցերին պատասխանել է «Ազատ քաղաքացի» ՀԿ նախագահ Հովսեփ Խուրշուդյանը
-Պարոն Խուրշուդյան, ԵՄ–ն Հայաստանի հավելյալ 1 միլիարդ եվրո է հատկացնելու՝ հասցնելով Հայաստանին տրամադրվելիք գումարը 2,6 միլիարդի: Ինչպե՞ս եք գնահատում։ Որքանո՞վ կառավարությունն ի վիճակի կլինի իրականացնել ԵՄ առաջարկած ծրագրերը։
-Կարծում եմ, որ Եվրամիությունը մինչև նման խոշոր գումար տրամադրելը կատարել է ռիսկերի գնահատում: Ընդհանրապես, նման գումարներ պահեկան որոշումներով չեն տրվում: Տեսեք, Ուկրաինան, որն իր բնակչության չափով Հայասատանից գրեթե 20 անգամ ավելին է, ստանալու է մեկ միլիարդով ավելի քիչ գումար, քան Հայաստանը: Պատճառը՝ այդ երկրում ժողովրդավարական ինստիտուտների շատ ավելի անկատար լինելն է, ինչը բերում է կոռուպցիայի մեծ ծավալների, ինչը մեզ մոտ, բարեբախտաբար, հաղթահարվել է, և դա գնահատում են Արևմուտքում:
-Իշխանություների կողմից տեսնո՞ւմ եք արդյոք հանձնառություն ԵՄ-ի հետ հարաբերությունները խորացնելու։
-Առանց այդպիսի հանձնառության ևս ԵՄ-ն այս գումարը չէր որոշի Հայաստանին տրամադրել: Վստահ եմ, որ հունիսին Փարիզ և Բրյուսել կատարած իր այցի ընթացքում Նիկոլ Փաշինյանը փոխանցել է եվրոպացիներին իր կառավարության տրամադրվածությունը ավելի սերտ ինտեգրման Եվրամիության հետ: Այս գումարներով մենք կարող ենք բարելավվել մեր թե՛ տնտեսական և թե՛ քաղաքական չափանիշները, որպեսզի հենց առաջին հնարավորության դեպքում՝ հայտ ներկայացնենք ԵՄ-ի հետ բարձր մակարդակի ինտեգրման, եթե ոչ՝ ԵՄ անդամակցության: Մինչ այդ Հայաստան-ԵՄ միջև ՍԵՊԱ-ի համաձայնագրի լիարժեք իրականացումը մեզ կարող է անգամ ավելի առաջ դնել ԵՄ-ի չափորոշիչներին համապատասխանելու հարցում, քան անգամ որոշ Ասոցացված երկրներ, քանի որ վերջիններում՝ երեքում էլ՝ Ուկրաինայում, Վրաստանում և Մոլդովայում բարեփոխումներն էապես դանդաղել են:
–Ինչպե՞ս եք գնահատում Շուշի դեսպանների այցը, չեն մասնակցել Մինսկի խմբի համանախագահ երկրների՝ ԱՄՆ, Ֆրանսիա և ՌԴ դեսպանները։
-Ոչ միայն այդ երեք երկրները, այլ նաև Կանադան, Հնդկաստանը ու եվրոպական երկրների մեծ մասը չմասնակցեցին այցին: Իհարկե, սա նաև մեր դիվանագիտության վատ աշխատանքի հետևանք է: Հուսամ նոր կառավարությունում կներգրավվեն շատ ավելի ջանասեր և արհեստավարժ արտգործնախարար՝ իր տեղակալներով և վարչության պետերով: Մեր դիվանագիտությունը ռեսթարտի կարիք ունի: Մենք չենք կարող մեզ թույլ տալ նման շռայլություն՝ անգործունակ կամ թույլ դիվանագիտական կորպուս ունենալու: Ցավալի է, իհարկե, որ այցին մասնակցել են անգամ այնպիսի երկրների դեսպաններ, որոնք ավանդաբար Հայաստանի հետ ունեն առանձնահատուկ լավ հարաբերություններ, օրինակ, Հունաստանինը, կամ Նիդերլանդներինը, որի Ազգային ժողովը հետևողական աշխատանքներ է տանում և բանաձևեր ընդունում՝ Ադրբեջանին պատերազմական հանցագործությունների համար պատասխանատվության ենթարկելու ուղղությամբ: Ինչևէ, լավ է, որ Մինսկի խմբի համանախագահ երկրները չայցելեցին Շուշի: Նրանք վերահստատեցին իրենց այն հանձնառությունը, որն արտացոլված է միջնորդների բոլոր ժամանակների կարգավորման առաջարկություններում, որոնցում Շուշին Արցախի անբաժանելի մաս է, նաև վերջին փաթեթում առկա այն դրույթին, ըստ որի Արցախի, ներառյալ Շուշիի կարգավիճակը պետք է որոշի Արցախի ժողովուրդը:
–Հայաստան–ԵՄ հարաբերություններում ինչպիսի՞ հեռանկար կա այն ֆոնին, երբ Հայաստանը գնալով խորացնում է կախվածությունը Ռուսաստանից։
-Հայաստան-ԵՄ հարաբերությունների հեռանկարը շատ մեծ է, իսկ Ռուսաստանից կախվածության աճի հանգամանքը որքան էլ որ կարճաժամկետ կտրվածքով ակներև է, սակայն, միաժամանակ, Հայաստանի ժողովրդի և իշխող վերնախավի մեծ մասի մտքերում Ռուսաստանը այլևս չի դիտվում որպես վստահելի գործընկեր, ավելին, շատերը ճշմարտացիորեն համարում են այդ երկրին սպառնալիք: Իսկ դա Ռուսաստանից միջնաժամկետ և, առավել ևս՝ երկարաժամկետ կտրվածքով ավելի անկախ դառնալու լավ հիմք է: Պետք է ավելի համարձակ քայլեր անել՝ ներգրավվելու Արևմուտքին և դրա գործիքները՝ ՄԱԿ-ին ու ԵԱՀԿ-ին մեր տարածաշրջանի խնդիրների լուծման գործում: Դա միակ երաշխիքն է ռուս-թուրք-ադրբեջանական ակցաններից դուրս պրծնելու: