Օպերատոր Լեքսո Լաշքարավայի մահվան կապակցությամբ Վրաստանում գործող լրատվամիջոցները համատեղ հայտարարություն են տարածում և դիմում դիվանագիտական կորպուսին, փոխանցում է Aliq.ge-ն։
«Վրաստանում լրագրողների, օպերատորների և լուսանկարիչների իրավունքների ոտնահարման դեպքերը մոտեցել են կրիտիկական սահմանագծին: Լրատվամիջոցների դեմ տասնյակ գործեր դեռևս քննված չեն: Իշխանություններին չի հաջողվում պաշտպանել լրագրողների անվտանգությունը, իսկ իշխող կուսակցության ներկայացուցիչների հայտարարությունները բռնություն են ներշնչում:
Հուլիսի 5-ին, ըստ ՆԳՆ-ի, վիրավորվել է ԶԼՄ-ների 53 ներկայացուցիչ, այդ թվում ` Պիրվելի հեռուստաընկերության օպերատոր Ալեքսանդր Լաշքարավան, որը հուլիսի 5-ին դաժանորեն ծեծվել էր ագրեսիվ խմբավորումների կողմից` մասնագիտական գործունեություն իրականացնելիս: Ալեքսանդր Լաշքարավան մահացավ հուլիսի 11-ին:
Լրատվամիջոցների ներկայացուցիչների մի մասը դեռ հիվանդանոցում է: Բռնության տարբեր խմբերի անդամները շարունակում են բացահայտ սպառնալ լրագրողներին և օպերատորներին, ինչին իրավապահ մարմինները պատշաճ չեն արձագանքում:
Ձերբակալված չեն նաև հուլիսի 5-ի հակաակցիայի կազմակերպիչները, որոնց ինքնությունը հայտնի է: Հատկանշական է, որ դեռևս չեն ուսումնասիրվել լրագրողների վրա հարձակումների մեծ մասը, լրատվամիջոցների գործունեությանը խոչընդոտելու և տեղի ունեցած բռնության փաստերը, ագրեսիվ խմբերի կազմակերպիչների պատասխանատվության հարցը չի լուծվել:
Մենք դիմում ենք Վրաստանում հավատարմագրված դիվանագիտական կորպուսի և միջազգային կազմակերպությունների ներկայացուցիչներին` անհապաղ և արդյունավետ արձագանքել հուլիսի 5-ին Ռուսթավելի պողոտայում ԶԼՄ-ների ներկայացուցիչների նպատակային հետապնդմանը, առողջությանը վնաս պատճառելու փաստերին, մասնագիտական գործունեության խոչընդոտմանը, նաև Վրաստանի իշխանությունների անգործությունը», — ասված է հայտարարության մեջ:
