Barcamp-ը մի կաթսա է, որտեղ խառնվում են, եռում են բոլոր թեմաները ու դրանից մի լավ բան ստացվում է։ Այս մասին «Առաջին լրատվական»-ի հետ զրույցում ասաց տեղեկատվական անվտանգության մասնագետ, barcamp-ի կազմակերպիչ Սամվել Մարտիրոսյանը։
Հիշեցնենք, որ վերջին տարիներին Հայաստանում ամեն տարի կազմակերպվում է Barcamp, որին մասնակցում են ՏՏ ոլորտի գրեթե բոլոր մասնագետները, IT կազմակերպությունները՝ ինչպես սկսնակ, այնպես էլ այդ ոլորտում բավական լուրջ առաջընթաց գրանցած։
Այս տարի Barcamp-ի շրջանակներում մի քանի թեմաներ են քննարկվում՝ կիբերանվտանգություն, արհեստական բանականություն, մեդիաանվտանգություն և այլն։
Մարտիրոսյանի խոսքով՝ Հայաստանը բավական լուրջ ներուժ ունի արհեստական բանականության ուղղությամբ և եթե լուրջ մոտեցում լինի, լինի պետության աջակցությունը, ապա մենք մեծ շանս ունենք այդ ուղղությամբ զարգանալ։