«Այս պահի դրությամբ հայ-ադրբեջանական սահմանին Ռուսաստանի դաշնության սահմանապահների տեղակայման համար որևէ իրավական հիմք գոյություն չունի»,-«Առաջին լրատվական»-ի հետ զրույցում ասաց «Իրազեկ քաղաքացիների միավորում» ՀԿ նախագահ Դանիել Իոաննիսյանը։
Հիշեցնենք, որ այսօր Գեղարքունիքի մարզպետ Գնել Սանոսյանը ասուլիսի ժամանակ հայտարարել էր, որ ռուս զինվորականների մի մասն արդեն Գեղարքունիքի մարզում է, որոշակի փուլից հետո նրանք կտեղակայվեն սահմանի երկայնքով, ինչից հետո ճշգրտումներ կարվեն։ «Համատեղ պրոցես է գնում, որի արդյունքում ռուսական կողմի գործընկերները՝ զինվորականները, նրանց մի մասը արդեն մարզում են, և որոշակի փուլից հետո արդեն նրանք կտեղակայվեն սահմանի երկայնքով, հայ և արդբեջանական զինված ուժերը դուրս կբերվեն այդ հատվածներից, որից հետո մնացած բանակցային պրոցեսը կգնա և որոշակի հատվածներում ճշգրտումներ կարվեն», – ասել է Սանոսյանը։ Նա նաև տեղեկացրել է, որ բանակցությունները եռակողմ են՝ Հայաստան – Ռուսաստան – Ադրբեջան ձևաչափով: Բայց թե ռուս սահմանապահներ կտեղակայվեն սահմանի երկայնքով, մարզպետը հստակ ժամկետներ չի նշել, բայց ասել է, որ օրերի հարց է։ Սանոսյանը նաև հստակ չի ասել, թե ռուս սահմանապահները ժամանակավո՞ր են տեղակայվում հայ-ադրբեջանական սահմանին, թե ոչ։
ՀՀ-ում Ռուսաստանի դաշնության սահմանապահ զորքերի գործունեությունը, հիշեցնենք, կանոնակարգվում է 1992 թվականին ստորագրված երկկողմ պայմանագրով, որով սահմանվում է, որ ռուս սահմանապահների գործառույթները սահմանափակվում են Իրանի և Թուրքիայի սահմանների պաշտպանությամբ։ «Զվարթնոց օդակայանում իրենց տեղակայումը և այդտեղից դուրս չգալը, իսկ այժմ էլ հայ-ադրբեջանական սահմանին կանգնելը իրավական հիմնավորում չունի։ Կարելի է քննարկել նրանց այդտեղ տեղակայումը լավ է, թե վատ է, բայց արձանագրենք, որ գոնե իրավական չէ գործընթացը»,-ասաց Իոաննիսյանը՝ հավելելով, որ շատ խնդրահարույց է, որ գործընթացը ծավալվում է առանց իրավական հիմնավորումների. «Կարող է իրավիճակ լինել, երբ ինչ-որ մեկը ապօրինի հատի սահմանի այդ հատվածը և ռուս սահմանապահները բռնեն այդ քաղաքացուն, ապա նա կարող է գնա Մարդու իրավուքների եվրոպական դատարան և հարց բարձրացնի, թե ռուս սահմանապահները ի՞նչ գործ ունեն հայ-ադրբեջանական սահմանին, որ իրեն բռնել են ու իրեն ձերբակալելու փաստը կարող է ճանաչվել ապօրինի։ Սա պարզ օրինակ է, բայց ցույց է տալիս, որ եթե գործընթացն արվում է առանց իրավական հիմքերի, ապա խնդիրներ կարող են առաջանալ»,-ասաց մեր զրուցակիցը՝ հավելելով, որ կարելի է շատ արագ միջպետական պայմանագիր պատրաստել ու ստորագրել, բայց կարելի է նաև 1992 թվականի պայմանագիրը լրամշակել.«Երկու տարբերակն էլ կարելի է անել։ Տեխնիկական հարց է, թե որն է ավելի հեշտ։ Կարծում եմ՝ առավել հեշտ է 1992 թվականի պայմանագիրը լրամշակել»,-ասաց մեր զրուցակիցը։
Նույն խնդիրը առաջ է գալու նաև հայ-ադրբեջանական սահմանի Սյունիքի հատվածում, որտեղ ևս տեղակայվելու են ռուս սահմանապահներ։ Այդ նպատակով անգամ վերջերս կառավարության որոշմամբ անհատույց և անժամկետ հողատարածքներ հատկացվեցին ռուս սահմանապահներին, որպեսզի նրանց համար անհրաժեշտ պայմաններ կառուցվեն։ «Այո, Սյունիքում էլ նույն խնդիրն է։ Մարզը էական չէ, էական է, թե ռուս սահմանապահները որ երկրի հետ սահմանին են կանգնում։ Իրանի և Թուրքիայի հետ սահմանին այս պահին իրենց լինելն իրավաչափ է, նորմալ է, իսկ Ադրբեջանի հետ սահմանին իրավական որևէ կարգավորում չկա»,-եզրափակեց Իոաննիսյանը։
Լուսանկարը՝ Armeniasputnik-ի