«Թալիբան» շարժման զինյալները հայտարարել են, որ իրենք վերահսկողություն են հաստատել Իրանի ու Թուրքմենստանի հետ Աֆղանստանի սահմանային անցակետերի վրա: Անցակետերը տեղակայված են Հերաթ նահանգում, ուրբաթ, հուլիսի 9-ին հաղորդել է TOLOnews- ը՝ վկայակոչելով նահանգի մաքսային ծառայության ղեկավարի պաշտոնակատարին:
Պարզաբանվում է, որ գրոհայինները հայտարարել են Իսլամ Կալա և Թորգունդի քաղաքներում մաքսակետերի գրավման մասին: Պորտալի նահանգային աղբյուրները հավելում են, որ Իսլամ Քալայի մաքսային բոլոր պաշտոնատար անձինք և այնտեղ տեղակայված մեծ թվով անվտանգության ուժեր հատել են Իրանի սահմանն այն բանից հետո, երբ թալիբները հայտնվել են տարածքում:
AP- ն հայտնում է, որ «Թալիբանի» խոսնակ Զաբիհուլլա Մուջահիդը հաստատել է Իսլամ Քալայի գրավումը:
Իր հերթին, Աֆղանստանի ներքին գործերի նախարարությունը հերքել է տեղեկություններն այն մասին, որ Իսլամ Քալա կետը դուրս է եկել կառավարության վերահսկողությունից:
Միևնույն ժամանակ, շարժման քաղաքական գրասենյակի պաշտոնական ներկայացուցիչ Մուհամմադ Նաիմն ասել է, որ Աֆղանստանին հարևան երկրները չպետք է անհանգստանան իրենց սահմանների անվտանգության համար: Նա հորդորել է չխառնվել երկրի ներքին գործերին:
«Ինչ վերաբերում է ընդհանուր առմամբ սահմաններին, ապա մենք բոլորին հավաստիացնում ենք, որ մեր կողմից խնդիրներ չկան: Մենք հորդորում ենք մեր բոլոր հարևաններին հանգիստ լինել սահմանների անվտանգության հետ կապված: Մենք նաև խնդրում ենք նրանց չխառնվել մեր ներքին գործերին: Մենք դա ոչ ոքի թույլ չենք տալիս: Մենք ցանկանում ենք ցանկացած խնդիր լուծել երկխոսության ու փոխըմբռնման միջոցով», – ասել է նա РИА Новости-ին:
