Հաիթիի նախագահի տիկինը՝ Մարտին Մոիզը, ում մասին մի շարք լրատվամիջոցներ հայտնել էին, որ հուլիսի 7-ին իրականացված հարձակման հետևանքով ստացած ծանր վնասվածքներից մահացել է, իրականում այս պահին գտնվում է կրիտիկական վիճակում: Նրան բուժման նպատակով տարհանում են Մայամի: Այս մասին հայտնել է ԱՄՆ-ում Հաիթիի դեսպան Էդմոն Բոկշիթը:
«Նա կայուն, բայց կրիտիկական վիճակում է: փորձում ենք նրան բուժման ուղարկել Մայամի»,- Reuters-ին ասել է դիվանագետը:
Հաիթիի նախագահ Ժովենել Մոիզը մահացու վիրավորում էր ստացել իր նստավայրի վրա անհայտ անձանց հարձակման հետևանքով: Հարձակումից նախագահի տիկինը ևս վիրավորվել էր և տեղափոխվել հիվանդանոց:
Երկրում հայտարարվել է ռազմական դրություն:
