Տոնական օրերին՝ հուլիսի 3-5-ը (հուլիսի 4-ին ԱՄՆ-ում նշվել է Անկախության օրը-խմբ․) առնվազն 233 մարդ է դարձել հրաձգությունների զոհը։ Այս մասին հայտնում է CNN-ը։
Հաղորդվում է, որ հուլիսի 3-5-ը ևս առնվազն 618 մարդ վնասվածքներ է ստացել երկրում հրազենի գործադրմամբ ավելի քան 500 միջադեպերում։ Ցուցանիշը 26 տոկոսով ցածր է անցած տարվա նույն օրերի համեմատ։
Միայն Նյու Յորքում գրանցվել է հրաձգության 29 դեպք։ Տուժել է 35 մարդ, որից 2-ը մահացել են։
Հրաձգություններ են տեղի ունեցել նաև Չիկագոյում, Տեխասում, Վիրջինիայում, Օհայոյում, Դալլասում և Ատլանտայում։
Այսպիսով, Չիկագոյում ուրբաթ երեկոյից մինչև երկուշաբթի առավոտ սպանվել է 18 մարդ, ևս 83-ը՝ ստացել հրազենային վնասվածքներ։
Նյու Յորք նահանգի նահանգապետ Էնդրյու Կուոմոն հայտարարել է արտակարգ դրության ռեժիմ սահմանելու մասին՝ հանցագործությունների թվի ավելացման պատճառով։
«Հրազենի կիրառմամբ բռնությունը հանգեցրել է հանրային առողջապահության ոլորտում ճգնաժամի։ Այս միջոցառումը թույլ կտա խնդրի լուծմանն ուղղել բոլոր անհրաժեշտ ռեսուրսներն ու ուշադրությունը»,-գրել է նա իր թվիթերյան էջում։
Դեռևս մայիսի 26-ին ԱՄՆ նախագահ Ջո Բայդենը կոչ էր արել Կոնգրեսին դադարեցնել երկրում զինված բռնության համաճարակը։