Աշնանը տեղական ինքնակառավարման մարմինների ընտրություններ են Հայաստանի մի շարք համայնքներում։ Որոշ համայնքներում հերթական ընտրություններ են, որոշներում էլ՝ դեռ անցած տարվանից Հայաստանում հայտարարված ռազմական ու արտակարգ դրության պատճառով հետաձգված ընտրություններ։
Այս ՏԻՄ ընտրությունները, սակայն, նախորդների համեմատ խոստանում են լինել ավելի թեժ, քանի որ հատկապես հունիսի 20-ին կայացած արտահերթ խորհրդարանական ընտրություններից հետո իշխանությունը հասկացավ ՏԻՄ-երում վստահելի ու իրենց թիմի անդամ համայնքի ղեկավարների անհրաժեշտությունը և, թերևս բոլոր համայնքներում իշխանությունը թեկնածուներ կառաջադրի ու գործող համայնքի ղեկավարների հետ, որոնք հիմնականում նախկին իշխանությունների թիմից են, թեժ մրցապայքարի մեջ կմտնի։
Ինչ վերաբերում է մնացած քաղաքական ուժերին, ապա հունիսի 20-ի ընտրություններից հետո շատերը դեռ չեն կողմնորոշվել։
Հանուն Հանրապետության կուսակցության ղեկավար մարմինը դեռևս պաշտոնապես որոշում չի կայացրել ՏԻՄ ընտրություններին մասնակցելու վերաբերյալ։ Այս մասին «Առաջին լրատվական»-ի հետ զրույցում ասաց կուսակցության ղեկավար մարմնի ներկայացուցիչ Արման Բաբաջանյանը՝ հավելելով, որ կարող է հաստատապես ասել, որ առաջիկա ՏԻՄ ընտրություններում մասնակցելը կարևոր քայլ կլինի թե նորաստեղծ կուսակցության կայացման և թե երկրում ժողովրդավարական գործընթացների անշրջելիության երաշխիքների ապահովման տեսանկյունից։ «Համոզում ունեմ, որ ԱԺ համապետական ընտրություններում «Հայաստան» և «Պատիվ ունեմ» դաշինքների ձայների մասը հնարավոր է եղել ապահովել տեղական բդեշխների, հանցագործ համայնքապետերի շնորհիվ։ Մինչև այս մանր կալիբրի լոկալ բանդիտները դուրս չշպրտվեն կառավարման մարմիններից՝ մենք չենք կարող ակնկալել քաղաքական դաշտի առողջացում ոչ տեղական ոչ համապետական մակարդակում։ Ընդհանրապես մեր կուսակցությունը չափազանց ակտիվ դերակատարում է որդեգրելու երկրի քաղաքական գործընթացների մասնակցության առումով։ Առաջիկայում կլինեն կուսակցության ակտիվի հետ քննարկումներ արտաքին և ներքին քաղաքական հիմնահարցերի վերաբերյալ, կհանրայնացնենք կուսակցության դիրքորոշումը երկրի արտաքին քաղաքական և անվտանգային խնդիների վերաբերյալ, ինչպես նաև կսկսենք մարզային այցերը, կգույքագրենք մեր քաղաքական կապիտալը և ըստ այդմ կորոշենք որ համայնքում ինչ ձևաչափով կմասնակցենք ընտրության»,-ասաց Բաբաջանյանը։
«Քաղաքացու որոշում» կուսակցության վարչության անդամ Միքայել Նահապետյանը «Առաջին լրատվական»-ի հետ զրույցում ասաց, որ իրենք կարևորում են Տեղական ինքնակառավարման ընտրությունները ժողովրդավարության տեսանկյունից, որովհետև կուսակցությունները չեն կարող միայն երևանյան , մայրաքաղաքային կուսակցություն լինել։ «Այդ տեսանկյունից աշնանը սպասվող ընտրական տուրին մասնակցելու առումով դեռ վերջնական որոշում չունենք։ Այս պահին էլ մենք Սևանում արտագնա աշխատանքային քննարկում ենք անցկացնում և բոլոր գործոնների համադրմամբ ինչ-որ որոշման կգանք այդ առումով։ Այս պահին կարող եմ ասել, որ մեզ համար ՏԻՄ-ի հարցը ակտուալ է։ Իսկ ինչ վերաբերում է մասնակցության ձևաչափին, ապա դա դեռ պետք է հասկանանք, քանի որ ընտրությունները նաև ռեսուրսի, քաղաքական բովանդակության, միջավայրի հարց է․ Դրա համար պետք է քննարկենք ու վերջնական որոշում կայացնենք»,-ասաց Նահապետյանը։
«Պատիվ ունեմ» դաշինքի մամուլի խոսնակ Սոս Հակոբյանն էլ մեզ հետ զրույցում ասաց, որ ՏԻՄ ընտրությունների վերաբերյալ դեռ քննարկումներ չեն սկսել։ Առկա պրոցեսներով են զբաղված։