Եվրո-2020-ի առաջին կիսաեզրափակչում վաղը Իտալիայի ազգային թիմը կմրցի Իսպանիայի հետ։ Հուլիսի 7-ին էլ եզրափակչի ուղեգիրը կվիճարկեն Անգլիան և Դանիան։ Հայացք նետելով քառորդ եզրափակչի դիմակայություններին, կարող ենք ասել, որ կիսաեզրափակչում ունենք օբյեկտիվ և ինչ-որ տեղ նաև կանխատեսելի պատկեր։ Ավելի ստույգ, սպասվում էր, որ Անգլիան կհաղթի Ուկրաինային, Իտալիան՝ Բելգիային, Դանիան՝ Չեխիային, իսկ Իսպանիան՝ Շվեյցարիային։ Մեծ հաշվով կիսաեզրափակիչ դուրս եկած հավաքականներից, քառորդ եզրափակչում խնդիրներ ունեցավ միայն Իսպանիան, որը ցուցադրելով հերթական ձանձրալի ու մոնոտոն խաղը միայն հետխաղյա 11 մետրանոցներով հաղթեց Շվեյցարիային։ Վերջինս ի դեպ հանդիպման 77-րց րոպեից պայքարում էր 10 ֆուտբոլիստներով։ Շվեյցարիան արժանի էր դուրս գալ կիսաեզրափակիչ, բայց մարզական բախտը կրկին իսպանացիների կողմն էր։ Եզափակչի համար պայքարող 4 հավաքականներից Իսպանիան թերևս ամենաթույլն է։ Իտալիայի ընտրանին վաղը պարտավոր է հաղթել, այլապես եզրափակչում կունենանք միանգամայն պարադոքսալ պատկեր։ Ավելին, վերլուծելով իրավիճակը կարող է ասել, որ Իտալիան Եվրո-2020-ի հաղթողի գլխավոր հավակնորդն է։
Որոշ մասնագետների կարծիքով ձանձրալի և ոչ այնքան գրավիչ ֆուտբոլ է ցուցադրում նաև Անգլիայի հավաքականը։ Վերջինս քառորդ եզրափակչում 4։0 հաշվով առավելության հասավ Ուկրաինայի նկատմամբ։ Այս մրցավեճում անգլիացիները օգտագործեցին որակական առավելությունը։ Մասնավորապես, ֆուտբոլիստների ավելի բարձր կարգը էական նշանակություն ունեցավ։ Անգլիայի հավաքականի գլխավոր մարզիչ Գարեթ Սաութգեյթը որդեգրել է զգույշ միևնույն ժամանակ արդյունավետ մարտավարություն։ Ունենալով մեծ պոտենցիալ Անգլիան այսպես ասած քանդում է մրցակիցների խաղը օգտագործելով նաև սխալները։ Խմբային փուլում Սաութգեյթի թիմը խփելով ընդամենը 2 գնդակ վաստակել էր 7 միավոր։ Փլեյ-օֆֆի Գերմանիայի և Ուկրաինայի դեմ մրցավեճերում վերոնշյալ մարտավարությունը ավելի արդյուավետ աշխատեց։ Ամեն դեպքում ինչպես ընդունված է ասել, հաղթողին չեն դատում։ «Մեզ հրաշալի դրսևորեցինք կարևոր խաղում: Մենք ֆավորիտ էինք, ճնշումն ու սպասելիքները հսկայական էին: Դարձյալ խաղ առանց բաց թողած գոլի, խփած 4 գոլ ու իդեալական երեկո: Շարունակում ենք չոր հանդիպումների շարքը: Հրաշալի թիմ ունենք բոլոր դիրքերում: Մենք ճիշտ ուղու վրա ենք, շարժվում ենք դեպի մեր նպատակը: Հիմա ավելի փորձառու ենք, քան 2018թ. աշխարհի առաջնությունում: Հավատում ենք, որ կհասնենք մեր նպատակին, քանի որ գործը դեռ արված չէ»,- ասել է Ուկրաինայի հետ հանդիպումից հետո ասել է Անգլիայի հավաքականի հարձակման առաջատար Հարի Քեյնը: Ի դեպ, Անգլիայի հավաքականը պատմության մեջ առաջին թիմն է, որը Եվրոպայի առաջնությունում սեփական դարպասն անառիկ է պահում 5 խաղերում անընդմեջ: 1966թ. աշխարհի առաջնությունից հետո առաջին անգամ անգլիացիները մեծ մրցաշարերում 4 գոլ խփեցին փլեյ-օֆֆում: Անգլիացիները շարունակում են մնալ Եվրո-2020-ի միակ թիմը, որը գոլ բաց չի թողել մրցաշարում: Բացի այդ, Անգլիայի հավաքականը պատմության մեջ առաջին անգամ գոլ բաց չի թողնում 7 խաղ անընդմեջ:Առջևում Դանիայի հետ մրցավեճն է։ Դաինացիները ընթացիկ առաջնության բալանսավորված և աշխույժ ֆուտբոլ են ցուցադրում։
Այս խաղում ևս Սաութգեյթը կփորձի առավելության հասնել տակտիկական լուծումներով։ Ընդունենք սակայն, որ Դանիայի հավաքականն իր հերթին տակտիկապես հագեցած ֆուտբոլ է ցուցադրել վերջին երեք հանդիպումներում։ Ուստի, ասել, որ Անգլիան հեշտությամբ կհաղթի և դուրս կգա եզրափակիչ, ճիշտ չի լինի։ Ամեն դեպքում բուքմեյքերներն այս մրցավեճում բարձր են գնահատում անգլիացիների հաղթանակի հնարավորությունը։ Հանդիպման 90 րոպեներում Սաութգեյթի թիմի հաղթանակի համար սահմանված է 1․75 գործակից։ Ոչ-ոքին գնահատված է 3․6, իսկ Դանիայի հաղթանակը՝ 5․5 գործակցով։ Անգլիայի եզրափակիչ դուրս գալու գործակիցը՝ 1․3 է, իսկ Դանիայի կիսաեզրափակչի հաղթահարելու գործակիցը՝ 3․5։ Իտալիա-Իսպանիա մրցավեճում Բուքմեյքերները մի փոքր ավելի բարձր են գնահատել իտալացիների հաղթանակը։ Հանդիպման նման ելքի համար սահմանված է 2․55 գործակից։ Իսպանիայի հաղթանակը գնահատված է 3․15 գործակցով։ Նույնքան գործակից է սահմանված նաև ոչ-ոքիի համար։
Ըստ Բուքմեյքերների Եվրո-2020-ի գլխավոր ֆավորիտը Անգլիան է, որի չեմպիոն դառնալու գործակիցը 2․4 է։ Իտալիայի չեմպիոնության համար սահմանված է 3, իսկ Իսպանիայի հաղթանակի համար 3․75 գործակից։ Դանիայի չեմպիոն դառնալու գործակիցն էլ 9․5 է։
