Ամերիկյան Նյու Ջերսի նահանգը որոշում է ընդունել ճանաչել Արցախի անկախությունը: Ինչպես հայտնում է Ամերիկայի Հայ դատի գրասենյակը՝ 40 պատգամավորից ներկա է եղել 38-ը, 36-ը կողմ է քվեարկել, 2-ը՝ ձեռնպահ:
Փաստաթղթում, որտեղ անդրադարձ կա նաև Արցախյան վերջին պատերազմին, դատապարտվում է Արցախի ու Հայաստանի խաղաղ բնակչության դեմ Ադրբեջանի ու Թուրքիայի իրականացրած ագրեսիան:
Հիշեցնենք, որ ըստ Հայ դատի Ամերիկայի Արևելյան ափի հանձնախմբի ֆեյսբուքյան էջի, սենատոր Ջոզեֆ Լագանան նահանգային սենատի քննարկմանն էր ներկայացրել համապատասխան բանաձեւի նախագիծը:
Ամերիկագետ Սուրեն Սարգսյանի կարծիքով՝ Նյու Ջերսիի կողմից Արցախի անկախության ճանաչումը թե՛ իրավական և թե՛ քաղաքական առումով նախադեպ է․«Արդեն 10-րդ նահանգն է, որ ճանաչել է Արցախի անկախությունը և սա իհարկե նախադեպ է՝ չնայած ֆեդերալ իշխանության վրա որևէ ազդեցություն չի ունենա։ Մնացած նահանգներն էլ այս օրինակով կարող են ճանաչման պրոցես սկսել Լեռնային Ղարաբաղի համար։ Հիմա եթե Հայաստանի կողմից էլ լինեն դրական ազդակներ, Հայաստանի դիվանագիտությունն էլ իր դիրքավորումը հայտնի Լեռնային Ղարաբաղի հարցում՝ այսինքն ճանաչման պրոցես նախաձեռնի, սա նույնպես կարող է դրական ազդեցություն ունենալ։ Շատ բան կախված է նաև մեր դիրքորոշումից ու դիրքավորումից»,-«Առաջին լրատվական»-ի հետ զրույցում ասաց նա։
Հետաքրքրվեցինք, թե ի՞նչ սահմաններով է Նյու Ջերսին ճանաչել Արցախի անկախությունը․«Չկա որևէ ֆիքսված ձևակերպում սահմանների մասով և ես կարծում եմ, որ նման ձևակերպում տալու կխուսափեն։ Բայց ըստ իս՝ մինչև պատերազմը գոյություն ունեցող սահմանների մասին է խոսքը»։
Սուրեն Սարգսյանը հիշեցնում է, որ Հայոց Ցեղասպանությունը ճանաչվել էր ԱՄՆ 49 նահանգների կողմից, այսինքն՝ համարյա բոլոր նահանգները ճանաչել էին Ցեղասպանությունը․«Իհարկե սա իրավական ուժ չունի, որևէ պարտադրանք չկա ֆեդերալ իշխանության վրա, բայց այդ հանգամանքը որպես նախադեպ, նաև՝ բարոյական ճնշում կիրառվում էր ֆեդերալ իշխանության վրա՝ ստիպելով իշխանություններին գնալ ճանաչման գործընթացի։ Նույնն էլ Արցախի անկախության դեպքում։ Իհարկե մեզ հետևողական աշխատանք ու ջանքեր են պետք, բայց ես գտնում եմ, որ նման ճանաչումները շատ օգտակար են, մանավանդ, որ սա առաջին նման ճանաչումն էր, որ տեղի ունեցավ պատերազմից հետո։ Սա կարծում եմ՝ լավ նախադեպ է և հետևողական աշխատանքի դեպքում կարող ենք լավ արդյունքներ ունենալ»,-եզրափակեց նա։