Դրամի արժևորումն առնվազն 5-6 լուրջ տնտեսական գործոնով է պայմանավորված. ընդ որում այդ գործընթացն սկսվել է ապրիլի կեսերից, երբ դոլարի փոխարժեքը եղել է 540 դրամ, իսկ հունիս մտել ենք 520 դրամով: Այս մասին «Առաջին լրատվական.-ի հետ զրույցում նշեց Կենտրոնական բանկի նախկին նախագահ Բագրատ Ասատրյանը:
«Վերջին շաբաթվա մեջ տեմպն այո, արագացել է. 540-ից 495 դրամի անկումը շուրջ 9 տոկոս է կազմում: Մենք գործ ունենք լողացող փոխարժեքի հետ՝ պայմանավորված մի շարք գործոններով, այդ թվում ֆունդամենտալ տնտեսական: Այնտեղ կան նաև հոգեբանական, քաղաքական տիպի գործոններ, կայունացում կա, ուզես-չուզես: Այս ամեն ինչն ազդում է: Սա խորը վերլուծելու կարիք ունի, և Կենտրոնական բանկը դրանով զբաղվում է: Ի դեպ, դրամի արժևորման գործոնների մեջ Կենտրոնական բանկն էլ է իր դերն ունեցել, որը բարձրացրեց վերաֆինանսավորման տոկոսադրույքը և դրանով իսկ դրամը թանկացավ»,-ասաց նա:
Անդրադառնալով ԿԲ նախագահ Մարտին Գալստյանի հայտարարությանը, թե տնտեսությունն սկսում է շնչել, բայց դժվար է ասել՝ մարդիկ ներդրումներ կանեն, թե ոչ, Բագրատ Ասատրյանն ասաց. «Տնտեսությունն իսկապես սկսում է շնչել, իհարկե, ոչ այնպես, ինչպես ասում են պաշտոնյաները: Էկոնոմիկայի նախարարն ասում է երկնիշ տնտեսական աճ նք ունենալու: Մենք պետք է վերցնենք մեր վերջին 2 տարվա դինամիկան և նայենք 2019-ի համեմատությամբ, որովհետև 2020 թվականին մեծ անկում ենք ունեցել, և այս տարի ինչ աճ կա, դա անցած տարվա անկումից հետո վերականգնումն է: Եթե այդպես համադրում ես, այո, մենք թեթև վերականգնողական աճ ունենք, թե տնտեսական ակտիվության ցուցանիշով, թե առանձին ոլորտներում»:
ԿԲ նախկին նախագահն անդրադարձավ նաև ներդրումների խնդրին՝ նշելով. «Ուղղակի օտարերկրյա ներդրումներն ինչպես զրոյական եղել են, այդպես էլ մնացել են: Ներդրումների հոսքի կրճատման հետ մենք գործ ենք ունեցել վերջին 5-6 տարիներին, որը բազմաթիվ գործոններով է պայմանավորված եղել: Ինքը երկարատև գործընթաց էր և այդ կորը ավելի խորացավ անցած տարվա իրադարձությունների պատճառով: պատերազմում պարտված երկիր ենք, պարզ է, որ ներդրողները հայացքը կթեքեն Հայաստանից»: