Ամերիկյան ռազմածովային ուժերի USS Ross հրթիռակիր նավը մտել է Ռուսաստանի տարածքային ջրեր, ապա կտրուկ փոխել ուղղությունը. թեքվել է աջ ու կտրուկ նվազեցրել արագությունը: Այդ մասին հայտնում է Lenta.ru-ն՝ վկայակոչելով նավագնացությանը հետևող MarineTraffic պորտալի տվյալները:
Հունիսի 29-ին Նիդերլանդների պաշտպանության նախարարությունը մեղադրել էր Ռուսաստանին, որ վերջինիս կործանիչները Սև ծովում «վտանգավոր իրավիճակ» են ստեղծել՝ շատ մոտ թռչելով հոլանդական Evertsen հածանավին: ՌԴ ՊՆ-ն բացատրել է, որ հածանավը հունիսի 24-ին փոխել էր ուղղությունը դեպի Կերչի նեղուց, ինչից հետո միայն օդ էին բարձրացվել ռուսական Սու30 կործանիչներն ու Սու24 ռմբակոծիչները:
USS Ross-ն Օդեսայի նավահանգիստ էր մտել հունիսի 27-ին՝ մասնակցելու Sea Breeze ամենամյա բազմազգ զորավարժություններին:
Սև ծովում Sea Breeze-2021 վարժությունը սկսվել է հունիսի 28-ին և կշարունակվի մինչև հուլիսի 10-ը: Դրանցում ներգրավված են շուրջ 5000 զինվորներ և ավելի քան 30 նավեր տարբեր երկրներից: Մանևրումների մասնակիցներն են Ուկրաինան, ԱՄՆ-ը, Կանադան, Մեծ Բրիտանիան, Նիդեռլանդները, Բուլղարիան, Հունաստանը, Լատվիան և այլ գործընկեր երկրներ: