Բելառուսը հայտարարել է Եվրամիության Արևելյան գործընկերության ծրագրից դուրս գալու մասին: Մինսկը հայտարարել է, որ պատժամիջոցների պայմաններում չի կարող կատարել իր պարտավորությունները: Բելառուսը ակնհայտորեն դիմում է քաղաքական շանտաժի, Բրյուսելին ու եվրոպական մյուս մայրաքաղաքներին ակնարկելով, կամ պարզապես ուղիղ տեքստով ասելով, որ մնա ԵՄ Արևելյան Գործընկերության ծրագրում, եթե Եվրամիությունը չեղարկի պատժամիջոցները և ճնշումը Մինսկի վրա: Իսկ դրանք գագաթնակետին հասան «Ռայնէյր» ընկերության օդանավի հայտնի պատմության առիթով, որը նույն կերպ շանտաժով՝ իբրև թե ավիառումբի ահազանգով իջեցրել էին Մինսկում և ձերբակալել դրա մեջ գտնվող, «Նեքստ Տելեգրամ» ալիքի հիմնադիր, բլոգեր Պրոտասևիչին, որը Լուկաշենկոյի ընդդիմախոսներից է: Ինչպես հայտնի է, դրանից հետո խիստ պատժամիջոցներ կիրառվեցին թե Բելառուսի իշխանության, թե այդ երկրի ազգային ավիափոխադրող Բելավիա ընկերության նկատմամբ, այդ ընկերության համար գործնականում փակելով ամբողջ եվրոպական երկինքը:
Եվրամիության Արևելյան գործընկերության ծրագրի անդամ է հետխորհրդային վեց հանրապետություն՝ Հայաստան, Վրաստան, Ադրբեջան, Բելառուս, Ուկրաինա և Մոլդովա: Մոլդովան, Վրաստանը և Ուկրաինան ստորագրել են Ասոցացման համաձայնագիր, իսկ Հայաստանը՝ համապարփակ գործընկերության ծրագիրը: Բելառուսն ու Ադրբեջանը գտնվում են ավելի ցածր մակարդակի վրա, ինչը պայմանավորված է այդ երկրներում իշխանության ամբողջատիրական, բռնատիրական բնույթից: Օրերս, Եվրամիություն-ԱՄՆ վեհաժողովի արդյունքում հայտարարվեց, որ Վաշինգտոնն ու Բրյուսելը հավատարիմ են ԵՄ ԱԳ անդամ երկրների ինքնիշխանությանն ու ժողովրդավարական բարեփոխումներին աջակցության իրենց հաստատակամության հարցում: Այդ ֆոնին ահա հնչում է Բելառուսի դեմարշն ու շանտաժը, որը նախադեպ դառնալու դեպքում ըստ էության քանդելու է Արևելյան գործընկերության ծրագիրը ամբողջությամբ: Բանն այն է, որ Բելառուսի նախադեպը աշխատելու դեպքում այն կարող է կիրառելի դառնալ օրինակ Ալիևի համար, առավել ևս, որ վերջինս դեռևս մի քանի տարի առաջ արել է ակնարկներ, որ Ադրբեջանին քննադատելու դեպքում իրենք կվերանայեն հարաբերությունը Եվրոպայի հետ: Իսկ էականն այստեղ այն է, որ Եվրամիությունը հայտարարել է Կովկասում իր ներգրավվածությունից չհրաժարվելու մասին, ինչպես ազդարարվեց ԵՄ արտգործնախարարների պատվիրակության օրերս կատարած ռեգիոնալ այցի ընթացքում՝ Հայաստան և Ադրբեջան: Բանն այն է, որ Եվրամիությունն իր արժեհամակարգային գործիքակազմով, այստեղ կարևոր խաղացող է, բայց եթե ստեղծվի ԵՄ հանդեպ շանտաժի գործուն նախադեպ, ապա կասկածից վեր է, որ հատկապես Թուրքիայի և ՌԴ օժանդակությամբ դրանից առատորեն փորձելու է օգտվել նաև Ադրբեջանը: Ըստ էության, Լուկաշենկոյի դեմարշը և շանտաժը Եվրամիության համար անուղղակի քննություն է նաև Կովկասի առումով, Կովկասում ԵՄ կենսունակության առումով: Եթե Եվրամիությունը տրվի Լուկաշենկոյի շանտաժին, ապա կասկածից վեր է, որ անելիք չունի Էրդողանի ու Պուտինի «տարածքում»: