Աշխարհի գործող չեմպիոն Ֆրանսիայի ազգային հավաքականը ևս լքեց Եվրո-2020-ը զիջելով Շվեյցարիային։ Բուխարեստում տեղի ունեցած հանդիպման մեկնարկում երկու թիմերը փոխանակվում էին գրոհներով: Սակայն առաջինն իր հնարավորությունն օգտագործեց Շվեյցարիան: 15-րդ րոպեից աչքի ընկավ Սեֆերովիչը: Երկրորդ կեսի մեկնարկում Շվեյցարիան 11 մետրանոց հարվածի իրավունք ստացավ, որը չկարողացավ իրացնել Ռոդրիգեսը: Հաջորդող երկու րոպեների ընթացքում Ֆրանսիայի ազգային թիմի կազմում դուբլի հեղինակ դարձավ Կարիամ Բենզեման: Ֆրանսիան շարունակեց տիրել նախաձեռնությանը: Խաղի 75-րդ րոպեին հեռահար, դիպուկ հարվածով աչքի ընկավ Պոլ Պոգբան: Շվեյցարիան չհանձնվեց և կարողացավ կրճատել հաշվի տարբերությունը: Դուբլի հեղինակ դարձավ Սեֆերովիչը: Հանդիպման վերջին րոպեին շվեյցարացիները ֆանտաստիկ խաղով վերականգնեցին հաշվի հավասարությունը: Գոլն իր ակտիվում գրանցեց Գավրանովիչը: Ֆրանսիա-Շվեյցարիա` 3:3: Հանդիպումը տեղափոխվեց լրացուցիչ, որտեղ ևս ֆարպասի գրավում չարձանագրվեց: Հետխաղյա 11 մետրանոց հարվածաշարում առավել դիպուկ էին Շվեյցարիան: 4։4 հաշվի ժամանակ վրիպեց Ֆրանսիայի հարձակման գծի առաջատար Կիլիան Մբապեն։ Ասել, որ Ֆրանսիայի բախտը չբերեց այս դիմակայությունում և Շվեյցարիան արժանի չէր քառորդ եզրափակչում հայտնվելու, միանգամայն ճիշտ չի լինի։
Այո, անհատապես ֆրանսիացիներն ավելի ուժեղ էին և տպավորություն էր ստեղծվում, որ աշխարհի գործող չեմպիոնը մեծ առավելություն ունի։ Որոշ դրվագներում, այո ֆրանսիացիներն ունեին առավելութուն, բայց․․․։ Շվեյցարիան գործեց գրագետ, մեկը բոլորի համար, բոլորը մեկի՝ սկզբունքով։ Շվեյցարիան կարող էր հաշիվը դարձնել 2։0 և լուրջ նախադրյալ ստեղծեր խաղի հիմնական ժամանակում հաղթելու։ Ռոդրիգեսի չիրացրած 11 մետրանոցից հետո Շվեյցարիան հոգեբանական անկում ապրեց, որը տևեց սակայն մի քանի րոպե։ Միայն այս իրավիճակում Ֆրանսիան կարողացավ առավելություն ստանալ։ Շվեյցարիան տակտիկապես և թիմային խաղով գերազանցեց աշխարհի չեմպիոնին և դա փաստ է։ Փաստ է նաև, որ Շվեյցարիան արժանի էր մեծ հաղթանակին։ «Արեցինք այն ամենը, ինչ հարկավոր էր հաշիվը 3:1 դարձնելու համար, իսկ հետո զգացվեց թուլություն, ինչն անսովոր է մեզ համար: Միշտ ցավալի է պարտվել հետխաղյա 11 մետրանոցներով: Կիլիան Մբապեն հուսահատված է բոլորի պես: Սակայն չենք կարող մեղադրել որևէ մեկին: Նա ինքն ընտրեց 5-րդ 11 մետրանոցն իրացնելու պատասխանատվությունը: Ինչ վերաբերում է հրաժարական տալուն, ապա այդ հարցը նույնիսկ դրված չէ իմ առջև: Մեր թիմը միասնական է: Այո, ես եմ պատասխանատու արդյունքի համար, սակայն թիմն աջակցում է ինձ: Իսկ ես միշտ աջակցում եմ իմ խաղացողներին: Հիմա պետք է ամեն բան վերլուծել, այլ ոչ թե տեղ տալ էմոցիաներին»,- խաղից հետո ասել է Դիդյե Դեշամը։ Խաղի հակահերոսը՝ Մբապեն այսօր ներողություն է խնդրել երկրպագուներից․ «Ցավում եմ չստացված 11 մետրանոց հարվածի համար: Գիտեմ, որ դուք` երկրպագուներդ, հիասթափված եք, ներողություն եմ խնդրում: Այս ամենը սպորտի մի մասն է, որն այդքան սիրում եմ»։
Նշենք, որ բուքմեյքերները այս առաջնության գլխավոր ֆավորիտ էին համարում հենց Ֆրանսիայի ազգային հավաքականին։ Ինչևէ, Ֆրանսիայի ձախողումից մեկ օր առաջ Եվրո-2020-ին հրաժեշտ էր տվել նաև Եվրոպայի գործող չեմպիոն Պորտուգալիայի հավաքականը։ Երեկ տեղի ունեցած մյուս՝ Իսպանիա-Խորվաթիա հանդիպումը ևս հագեցած էր դրամատիզմով և սուր դրվագներով։ Աշխարհի չեմպիոն Խորվաթիան լրացուցիչ ժամանակ զիջեց իսպանացիներին և դուրս մնաց հետագա պայքարից։ Մեկնարկային րոպեներին և ամբողջ խաղակեսում Իսպանիան առավելություն ուներ: Սակայն խորվաթներն առաջինն առաջ անցան հաշվի մեջ այն պարագայում, երբ ոչ մի հարված չէին կատարել դեպի դարպասը: Իսպանիայի հավաքականի կազմում անփույթի խաղով ինքնագոլի հեղինակ դարձավ իսպանացիներից Պեդրին: Իսպանիային հաջողվեց հետ բերել կորցրածը 38-րդ րոպեին: Ճիշտ ժամանակին, ճիշտ տեղում հայտնվեց Սարաբիան: Երկրորդ կեսի մեկնարկում Իսպանիան իր առավելությունը գոլի վերածեց 57-րդ րոպեին: Աչքի ընկավ Ասպիլիկուետան: Իսպանիան պահպանեց իր դիրքային առավելությունն ամբողջ խաղակեսի ընթացքում և արագ հակագրոհներից մեկի ժամանակ Ֆերրան Տորեսը ստանալով գնդակը օգտագործեց իր հնարավորությունը:
Խորվաթների բաց թողած գնդակից հետո նետվեցին հետ բերելու կորցրածը և կարողացան նախ կրճատել հաշվի տարբերությունը (գոլն իր ակտիվում գրանցեց Օրշիչը) և հետո նաև հավասարեցրին այն: Աչքի ընկավ Պաշալիչը: Հանդիպումը տեղափոխվեց լրացուցիչ ժամանակ, որտեղ Իսպանիան ևս երկու գնդակ ուղարկեց Խորվաթիայի դարպասը և կարողացավ հաղթել: Քառորդ եզրափակչում Իսպանիան կմրցի Շվեյցարայի հետ։
