«Հոկտեմբերի 27-ի անջատված մասով գործի քննությունը միայն ֆորմալ առումով է վերաբացվել Անահիտ Բախշյանի դիմումի հիման վրա։ Իսկ իրականում Հոկտեմբերի 27-ի գործը վերաբացվեց այն բանից հետո, երբ ՌԴ նախագահ Վլադիմիր Պուտինի Հայաստան այցից առաջ հանկարծակի Հայաստանում թունավորվեց քաղաքական ապաստան ստացած ոմն Շիշկին։ Դրանից մի քանի օր հետո հոկտեմբերի 27-ի գործի քննությունը վերսկսվեց»,- «Առաջին լրատվական»-ին տված հարցազրույցում ասաց ԱԺ երկրորդ գումարման պատգամավոր, ՌԴ կառավարությունում 2000-2003թթ. Հայաստանի հատուկ ներկայացուցիչ Տարոն Սահակյանը։ Վերջինս տևական ժամանակ Հայաստանում չէր և նոր է վերադարձել և մեզ հետ հարցազրույցում հոկտեմբերրի 27-ի գործի վերաբերյալ բավական ուշագրավ հայտարարություններ է արել։
Ըստ Սահակյանի՝ հոկտեմբերի 27-ի վերաբացված մասով քննությունը ներկայումս տարվում է Մեղրիի տարբերակի ուղղությամբ, բայց գործում առկա է աշխարհաքաղաքական շատ ավելի հետք, որը հենց պետք է պարզի քննչական խումբը։ «Փետրվար-մարտ ամսին ինձ համար շատ անսպասելի քննիչը հանկարծ սկսեց ինձ հարցաքննել և իբրև թե ուզում էր իմ միջոցով հարցաքննել Պնախարար Վաղարշակ Հարությունյանին Մեղրու տարբերակի հետ կապված։ Այ դրանից հետո, երբ գործը տարվեց այդ ուղղությամբ և ես սկսեցի լուրջ ձևով հակազդել դրան, շատ անսպասելի իմ առողջական վիճակը վատացավ, լուրջ բաներ պարզվեցին, ես մեկնեցի Մոսկվա, երկու վիրահատությունից հետո նոր վերադարձել եմ, բաց կարող եմ ասել, որ ինձ Մեղրու տարբերակի մեջ ներքաշելը սադրանք է քննիչների կողմից»,-ասաց Սահակյանը՝ հավելելով.«Իսկ իրականում հոկտեմբերի 27-ի ռազմաքաղաքական բաղադրիչի բացահայտումը կատարվել է Լևոն Տեր-Պետրոսյանի ժամանակ։ Նա իր մամուլի ասուլիսում ասաց, որ Լիսաբոնի գագաթաժողովից առաջ Տեխասի նավթային կազմակերպությունների Բրիթիշ պետրոլյումի միջոցով այն փաստաթուղթ, որը Քլինթոնի միջոցով մի գիշերվա մեջ ներկայացվել է։ Եթե քննիչը Տեր-Պետրոսյանի այս հայտարարության կողքին դնի այն փաստաթղթերը, որոնք Վազգեն Սարգսյանի ու Կարեն Դեմիրճյանի միջոցով ես մինչև հոկտեմբերի 27-ը դրել էի շրջանառության մեջ, ապա հոկտեմբերի 27-ի աշխարհաքաղաքական հետքը կբացահայտվի։ Ավելի մարդկային լեզվով ասած՝ այդ ծրագրով ազատագրված տարածքները մնում էին Հայաստանի հսկողության տակ և ամենայն հավանականությամբ՝ ստեղծվում էր ազատ տնտեսական գոտի։ Սա է, որ քննությունը թաքցնում է և կանգնում է Մեղրու տարբերակի վրա»,-ասաց Սահակյանը՝ հավելելով, որ բոլոր երեք նախագահները պարտադիր պետք է հարցաքննվեն հոկտեմբերիր 27-ի գործով։
Առավել մանրամասն՝ տեսանյութում