«Շիրինյան-Բաբաջանյան ժողովրդավարների դաշինք»-ի նախընտրական ցուցակը գլխավորող Արման Բաբաջանյանի ավտոմեքենայի վրա կրակած անձը կալանավորվել է: Այս մասին «Առաջին լրատվական»-ին հայտնեց ՀՀ Քննչական կոմիտեի տեղեկատվության և հասարակայնության հետ կապերի բաժնի պետ Վարդան Թադևոսյանը:
Հիշեցնենք, որ ԱԺ արտահերթ ընտրությունների օրը՝ հունիսի 20-ին, կրակել էին Արման Բաբաջանյանի «Լենդ քրաուզեր պռադո» մակնիշի ավտոմեքենայի վրա, ինչից վնասվել էր մեքենայի դիմապակին:
ՔԿ-ի հարղորդագրության համաձայն, դեպքի առթիվ հարուցվել էր քրեական գործ գույքը դիտավորությամբ ոչնչացնելը կամ վնասելու կասկածանքով, ինչպես նաև 235-րդ հոդվածի 1-ին մասերով (Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը)։
Ավելի ուշ հարուցվել էր ևս մեկ քրեական գործ՝ ՀՀ քրեական օրենսգրքի 34-305-րդ հոդվածի հատկանիշներով (Պետական, քաղաքական կամ հասարակական գործչի սպանության փորձ): Արդեն հունիսի 22-ին որոշում էր կայացվել քրեական գործերը միացնել և շարունակել մեկ վարույթում:
Վերոնշյալ հանցագործությունները կատարելու կասկածանքով ձերբակալվել էր Երևան քաղաքի բնակիչ, 44-ամյա Նիկոլայ Խ.-ն:
Փաստաբան Սեդա Սաֆարյանը տեղի ունեցածը հասարակական պետական գործչի նկատմամբ սպանության փորձ է համարել՝ նշելով, որ գործը պետք է դիտարկվի հենց այդ հանցակազմով:
