Նախօրեին հայտնի դարձավ, որ Հայաստանի ձյուդոյի հավաքականի առաջատար Ֆերդինանդ Կարապետյանը մասնակցելու է հուլիսի 23-ին Տոկիոյում մեկնարկելիք Օլիմպիական խաղերին։ Հայաստանի ձյուդոյի ֆեդերացիան հայտնում է, որ Միջազգային ֆեդերացիան ներկայացրել է Տոկիոյի Օլիմպիական խաղերի մասնակիցների անունները, որոնց թվում է նաև 73 կգ քաշային Ֆերդինանդ Կարապետյանը: Վերջինս մասնակցել էր մի քանի վարկանիշային մրցաշարերի և հավաքել անհրաժեշտ միավորներ։ Արդյունքների ամփոփումից հետո նրան վերջապես տրվեց օլիմպիական ուղեգիրը։ Կարապետյանը Եվրոպայի չեմպիոն և մեր ամենահավակնոտ մարզիկներից է։ Վստահ ենք, որ օլիմպիադայում ելույթ ունենալու նորությունը էլ ավելի կմոտիվացնի Կարապետյանին և նա պայքար կմղի մեդալների համար։ Այս պահին Հայաստանն ուն 13 օլիմպիական ուղեգրեր, որոնք նվաճել են մարմնամարզիկ Արթուր Դավթյանը, հունահռոմեական ոճի ըմբիշներ Արթուր Ալեքսանյանը, Կարապետ Չալյանը, Արմեն Մելիքյանը, Կարեն Ասլանյանը, ազատ ոճային ըմբիշներ Արսեն Հարությունյանը, Վազգեն Թևանյանը, բռնցքամարտիկներ Կորյուն Սողոմոնյանը, Արման Դարչինյանը, եռացատկորդ Լևոն Աղասյանը, հրաձիգ Էլմիրա Կարապետյանը, ծանրորդներ Սիմոն Մարտիրոսյանը և Իզաբելլա Յայլյանը:
Օլիմպիական խաղերին կմասնակցի նաև բռնցքամարտի Հայաստանի հավաքականի առաջատար Հովհաննես Բաչկովը, որը վերջերս տեղի ունեցած վարկանիշային մրցաշարում մրցավարների կողմնակալ որոշման զոհ էր դարձել։ «Վարկանիշային մրցաշարի արդյունքներն ինձ չեն գոհացնում: Պարտությունների մեծ մասը վիճարկելի էին մրցավարության պատճառով: Իմ անձնական կարծիքով՝ ոչ թե անում էին այնպես, որ հայ բռնցքամարտիկները պարտվեին, այլ զուտ ոչ պրոֆեսիոնալ մրցավարություն էր: Բաչկովի մենամարտի ավարտին մնացել էր 10 վայրկյան, և նա հաղթում էր: Մենամարտը վերջին վայրկյաններին կանգնեցնելու իրավունք չունեին: Վնասվածքը լուրջ էր, բայց պետք է թողնեին ավարտվեր այդ ռաունդը, որոշեին հաղթողին: «Երեք ուղեգիր ունենք՝ Կորյուն Սողոմոնյան (52 կգ), Արման Դարչինյան (75 կգ) եւ Հովհաննես Բաչկով (63 կգ): Բաչկովը վարկանիշային միավորներով Եվրոպայի առաջին համարն է: Քանի որ եվրոպական գոտու վարկանիշային մրցաշարը չեղարկվեց, վարկանիշները կբաժանեն ռեյտինգներով, իսկ Հովհաննես Բաչկովը Եվրոպայի առաջին համարն է իր քաշային կարգում, եւ նա կստանա օլիմպիական ուղեգիր: Սա սպիտակ քարտ չի համարվում: Մեծ հավանականություն կա, որ նույն կարգով՝ վարկանիշներով օլիմպիական ուղեգիր կունենա նաեւ կանանց Եվրոպայի Մ-22 եւ աշխարհի երիտասարդական առաջնությունների չեմպիոն Անուշ Գրիգորյանը, բայց դեռ վերջնական չէ: Այժմ սպասում ենք միավորների հաշվարկին: Մեր հաշվարկով միավորներով Անուշն ու սերբ բռնցքամարտիկը հավասար են. տեսնենք՝ ում կտան առաջնահերթությունը»,- ասել էր Հայաստանի բռնցքամարտի ֆեդերացիայի նախագահ Հովհաննես Հովսեփյանը։
Այսպիսով, կա հավանականություն, որ Հայաստանի օլիմպիական հավաքականի վերջնական կազմը բաղկացած կլինի 15 մարզիկներից։ Հովհաննես Բաչկովը ևս մեդալների իրական հավակնորդ է։ Հիշեցնենք, որ դոպինգ սկանդալի պատճառով Հայաստանի ծանրամարտի հավաքականին հատկացվել է ընդամենը երկու տեղ։ Սիմոն Մարտիրոսյանին Տոկիո տանելու որուշումը կարծում ենք միանգամայն ճիշտ է։ Անկախ վերջին իրադարձություններից այս մարզիկը ոսկե մեդալի իրական հավակնորդն է։ Վստահ ենք, որ Մարտիրոսյանը կկարողանա հաղթահարել բոլոր դժվարությունները։ Նա աշխարհի գործող չեմպիոնն է և հայկական ծանրամարտի առաջատարը։ Այո, այս տարի մեր օլիմպիական հավաքականի կազմը համեստ է, բայց լիահույս ենք, որ հայ մարզիկներին կհաջողվի գոնե 3-4 մեդալ նվաճել։ Ոսկի ենք ակնկալում Սիմոն Մարտիրոսյանից, Արթուր Ալեքսանյանից, Վազգեն Թևանյանից ինչպես նաև Արսեն Հարությունյանից։ Մեդալներ ենք ակնկալում նաև մեր մյուս օլիմպիականներից։
Նշենք, որ 2016 թվականին Ռիոյում կայացած նախորդ օլիմպիական խաղերում Հայաստանի հավաքականը կազմված էր 33 մարզիկներից։ Նախորդ Օլիմպիադայում Հայաստանը նվաճել էր 4 մեդալ՝ մեկ ոսկե և երեք արծաթե։ Օլիմպիական չեմպիոն էր դարձել Արթուր Ալեքսանյանը, իսկ Միհրան Հարությունյանը, Սիմոն Մարտիրոսյանը և Գոռ Մինասյանը նվաճել էին արծաթե մեդալ։ 5 տարի անց մեր գլխավոր հույսը կրկին Արթուր Ալեքսանյանն է։
