COVID-19-ի դեմ պատվաստանյութի երկու դեղաչափով չափահաս բնակչության ավելի քան 50 տոկոսին կարողացել է պատվաստել ընդամենը 13 պետություն և 6 փոքր տարածք։ Այս մասին են վկայում բրիտանական գիտավերլուծական Airfinity ընկերության տվյալները։
Խոսքը Սեյշելյան կղզիների, Իսրայելի, Մոնղոլիայի, Բահրեյնի, Չիլիի, Մալթայի, Մեծ Բրիտանիայի, ԱՄՆ-ի, Հունգարիայի, Իսլանդիայի, Ուրուգվայի, Քաթարի և ԱՄԷ-ի մասին է։
Բնակչության կեսից ավելիին պատվաստել են նաև Բերմուդյան կղզիներում, նիդերլանդական Արուբա կղզում, Սինտ-Մարտենում (երկիր՝ Նիդերլանդների թագավորության կազմում), Անգիլիայում (բրիտանական անդրծովյան տարածք Կարիբյան ծովի արևելքում), Մեն կղզում (ԱՄՆ), և Կուկի կղզիներում (Նոր Զելանդիայի հետ ասոցացված կղզային պետություն)։
Չնայած այն բանին, որ մոլորակի ամենախիտ բնակեցված երկիր Չինաստանը դեռևս չի անցել բնակչության պատվաստման 50 տոկոսի շեմը, այն համաշխարհային մասշտաբում անվիճելի առաջատար է։ Երկրում կատարվել է 1 մլրդ պատվաստում․ դա աշխարհում արդեն ներարկված պատվաստանյութերի թվի ավելի քան 1/3-ն է։
Պատվաստանյութերի սղության խնդիրն ակտուալ է մոլորակի շատ անկյունների համար։ Airfinity-ի տվյալներով՝ ավելի քան 60 երկիր և տարածք, հիմնականում Աֆրիկայում և Խաղաղօվկիանոսյան տարածաշրջանում, չեն ստացել պատվաստանյութի ոչ մի դեղաչափ։ Եվս տասնյակից ավելի պետություններ կարողացել են պատվաստել 1 տոկոսից քիչ քաղաքացիների։