Աֆղանստանի արտաքին գործերի նախարար Մոհամադ Հանիֆ Աթմարը կարծում է, որ երկրից օտարերկրյա զորքերի դուրսբերումը կավարտվի մի քանի շաբաթ անց, գրում է ՏԱՍՍ-ը։
«Մի քանի շաբաթ անց օտարերկրյա զորքերի դուրսբերումը կավարտվի։ Իրավիճակը պահանջում է միջազգային հանրության դիրքորոշման լուրջ վերանայում։ Դոհայի համաձայնագրերը և ՄԱԿ-ի Անվտանգության խորհրդի բանաձևերը պետք է հարգվեն»,- ասել է նա՝ երեքշաբթի օրը ելույթ ունենալով ՄԱԿ-ի Անվտանգության խորհրդի նիստում:
Ապրիլի 14-ին ԱՄՆ նախագահ Ջո Բայդենը հայտարարել էր, որ որոշում է կայացրել դադարեցնել գործողությունները Աֆղանստանում:
Ակնկալվում է, որ ամերիկյան ռազմական զորակազմը Աֆղանստանից կհեռանա մինչև սեպտեմբերի 11-ը: Զորքերի դուրսբերումը սկսվել էր մայիսին, բայց Պենտագոնը հստակ ժամանակացույց չէր ներկայացրել երկրից հեռանալու տեմպերի մասին: ԱՄՆ-ից հետո ՆԱՏՕ-ի դաշնակիցները հայտարարել էին իրենց ուժերի դուրսբերման մասին:
