Գերմանիան անհրաժեշտ է համարում պահպանել փախստականների վերաբերյալ Թուրքիայի հետ համաձայնագիրը: Այս մասին երեքշաբթի օրը հայտարարել է Գերմանիայի կանցլեր Անգելա Մերկելը Եվրահանձնաժողովի նախագահ Ուրսուլա ֆոն դեր Լայենի հետ համատեղ մամուլի ասուլիսում, գրում է ՏԱՍՍ-ը։
«Մենք դեռ աշխատում ենք (առաջիկա հունիսի 24-25) ԵՄ գագաթնաժողովի որոշումների վրա: Կարծում եմ, որ ԵՄ և Թուրքիայի միջև այս համաձայնագիրը կարևոր է, այն պետք է էլ ավելի զարգացվի։ Ես դրանում համոզված եմ»,- ասել Մերկելը:
«Թուրքիան աշխատում է` աջակցելով ընդհանուր առմամբ 3.7 միլիոն սիրիացի փախստականների. այս առումով նա արժանի է մեր օգնությանը»,- ասել է նա:
Իր հերթին ֆոն դեր Լայենը նշել է, որ երկուշաբթի երեկոյան զրույց է ունեցել Թուրքիայի նախագահ Թայիփ Էրդողանի հետ: Նա ասել է, որ հունիսի 24-25-ին ԵՄ գագաթնաժողովի օրակարգում ներառված կլինեն Անկարայի հետ բանակցությունների վերսկսումը գլոբալ տաքացման և առողջության դեմ պայքարի, մաքսային միություն ստեղծելու հետ կապված հարցերը, ինչպես նաև միգրացիոն փաթեթը: «Այստեղ, իմ կարծիքով, կարևոր է Թուրքիային հետագա աջակցությունը»,- ասել է Եվրահանձնաժողովի ղեկավարը:
