ՀՀ վարչապետի պաշտոնակատար Նիկոլ Փաշինյանն այսօրվանից սկսել է խորհրդակցություններ ընտրություններին մասնակցած քաղաքական ուժերի հետ։ Երեկ Հանրապետության հրապարակում Նիկոլ Փաշինյանը հայտարարեց․
«Վաղը առավոտից քաղաքական խորհրդակցություններ եմ սկսում խորհրդարանական ընտրություններին մասնակցած այն ուժերի հետ, որոնք երկխոսելու, քննարկելու հակվածություն ունեն: Եվ ես նաև հույս ունեմ, որ ժողովուրդն այս մանդատը տալիս է ինձ, որովհետև, մենք պիտի մեր երկրի և ժողովրդի պատմության այս փուլում գնանք մեր մշակութային, գիտական, տնտեսական, բիզնես, հանրային և քաղաքական լավագույն ներուժի համախմբմանը և մեր ժողովրդի, Հայաստանի և Արցախի անվտանգությանը և բարեկեցությանը ծառայեցնելու»։
Քաղաքագետ Արմեն Վարդանյանը դրական է գնահատում վարչապետի՝ երկխոսության կոչը․ «Սպասված էր ինձ համար, որովհետև շատ ժողովրդավարական երկրներում, երբ նախընտրական շրջանում կրքերը եռում են, հետագայում հաղթող ղեկավարի կողմից արվում են կոնսոլիդացիայի և լարվածությունը թուլացնելու քայլեր։ Եթե հիշում եք՝ Քլինթոն-Թրամփ բանավեճի ժամանակ սուր մեղադրանքներ հնչեցին միմյանց հասցեին, նախագահական ընտրություններից հետո Թրամփը նման քայլեր ձեռնարկեց լարվածությունը թուլացնելու։ Նաև նման դրսևորումներ մեզ մոտ են եղել․ 2008-ից հետո Սերժ Սարգսյանը հրապարակավ ընդդիմադիր դաշտի բոլոր խաղացողներին կոչ արեց համախմբվել, քայլեր ձեռնարկել լարվածությունը թուլացնելու համար։ Այսինքն՝ սա միանգամայն դրական մեսիջ էր վարչապետի կողմից։ Եվ շատ կարևոր եմ համարում, որ նա կոչ արեց դադարեցնել հայհոյախոսությունը, ագրեսիան։ Հույս ունեմ, որ քաղաքական դաշտի խաղացողները կանսան այդ կոչին, և կսկսվի առողջ բանավեճերի շրջանը և ոչ թե միմյանց վիրավորելու, պիտակավորելու և թիրախավորելու շրջանը»,-ասաց քաղաքագետը։
Վարդանյանը հնարավոր է համարում այդ համագործակցությունը Արամ Սարգսյանի «Հանրապետություն» կուսակցության, Բաբաջանյան-Շիրինյան ժողովրդավարների դաշինքի խաղացողների հետ, կարծում է՝ ևս մի քանի կուսակցություններ կհետևեն վարչապետի կոչին և նրանց հետ կլինի տարբեր ձևաչափերով համագործակցություն, բայց խորհրդարանում ներկայացված ընդդիմադիր երկու ուժերն ավելի արմատական են տրամադրված և չեն հետևի այդ կոչին, քանի որ նրանք նույնիսկ այս ընտրությունների լեգիտիմությունն են փորձում վիճարկել։
Արդյոք նրանց միջամտությունը գործադիրում կարող է կառավարման որակի վրա ազդեցություն ունենալ։ Նա նշեց, որ առողջ քննադատությունը նույնպես կարող է դրական կերպով ազդեց կառավարման որակի վրա և անպայման չէ պաշտոններ վերցնել և այդպես փորձել զարգացնել որևէ ոլորտ, շատ հնարավոր է, որ մարդիկ որևէ պաշտոն չվերցնեն, բայց իրենց գիտելիքներով, փորձով նպաստեն պետության ուժեղացմանը։
Ըստ նրա՝ խորհրդարանում փոխադարձ մեղադրանքները կշարունակվեն, քանի որ երկու ուժերը ավելի արմատական են տրամադրված Նիկոլ Փաշինյանի կառավարության հանդեպ, և այնտեղ ժամանակ առ ժամանակ սուր մեղադրանքներ և վիրավորանքներ կհնչեն․ «Սա ցանկալի չէ, բայց կարևոր է, որ մեր քաղաքական դաշտի բանավեճը լինի առողջ դիսկուրսի շրջանակներում»։
