«Հայաստանի արտահերթ խորհրդարանական ընտրությունների արդյունքները մեզ համար անակնկալ չէին։ Փաշինյանի հաղթանակը սպասելի էր, բայց նա չստացավ այն 80 տոկոսը, որ ստացել էր նախորդ ընտրությունների ժամանակ»,-«Առաջին լրատվական»-ի հետ զրույցում նման տեսակետ հայտնեց ռուսաստանցի քաղաքագետ Ստանիսլավ Տարասովը։
Նրա դիտարկմամբ՝ Քոչարյանն էլ այս կերպ ամրապնդեց իր դիրքերը քաղաքական դաշտում ու ցույց տվեց, որ քաղաքը մասնատված է․«Պարադոքսն այն է, որ Փաշինյանի օգտին քվեարկեցին հայերը, որոնք պարտվել են ղարաբաղյան պատերազմում։ Սա նշանակում է, որ ղարաբաղյան հարցը ու պատերազմի պատճառները հայերին ամենաքիչն են հետաքրքրում։ Նրանք այդ բոլոր անհաջողությունները կապում են Փաշինյանին նախորդող իշխանությունների հետ։ Սա շատ կարևոր հանգամանք է»։
Մեր զրուցակիցը նաև կարծում է, որ արդյունավետ կառավարման համար պետք է բացարձակ մեծամասնություն․«Թե ինչպես կզարգանան իրադարձություններն առաջիկայում՝ դժվար է ասել։ Միանգամայն հնարավոր է, որ ընդդիմությունը հայտարարի, որ արդյունքները կեղծված են։ Հնարավոր է լինեն ներքաղաքական սրացումներ, հաշվեհարդարներ։ Առայժմ նորմալ զարգացման հեռանկարները շատ փոքր են։ Բայց տեսնենք, գուցե Փաշինյանն ավելի հեռատես լինի ու կարողանա իշխանությունը պահել»։
Քաղաքագետը՝ խոսելով Մոսկվայի դիրքորոշման մասին, նկատեց․«Մոսկվան այստեղ չի ընտրել։ Մոսկվան ուներ չեզոք դիրքորոշում։ Մենք խաղադրույք չենք արել ո՛չ Փաշինյանի և ո՛չ էլ Քոչարյանի վրա։ Մենք կարծում ենք, որ սա հայերի ներքին խնդիրն է։ Մոսկվան կաշխատի այն իշխանության հետ, ով կհաղթի։ Տվյալ դեպքում հաղթել է Փաշինյանը, Մոսկվան կաշխատի Փաշինյանի հետ։ Պետք չէ մտածել, թե Մոսկվան որևէ մեկին աջակցում էր կամ ուներ նախընտրած թեկնածու»։
Ինչ վերաբերում է Հայաստանի արտաքին քաղաքականության հնարավոր փոփոխություններին, մեր զրուցակիցը նկատեց․«Կարող ենք վստահորեն ասել, որ հայ-ռուսական հարաբերությունները կընթանան այն նույն հունով, որ եղել է նախկինում։ Բայց դուք հիմա չունեք արտաքին գործերի նախարար և չկա մեկը, ում հետ կարելի է երկխոսություն ծավալել։ Մենք չգիտենք, թե ինչպիսին կլինի նոր նախարարի արտաքին քաղաքականությունը։ Ժամանակը ցույց կտա»։
