Թուրքիայի Սահմանադրական դատարանն ընդունել է ընդդիմադիր քրդամետ «Ժողովուրդների դեմոկրատական» կուսակցության (ԺԴԿ-HDP) գործունեության դադարեցումը պահանջող մեղադրական եզրակացությունը։
Ermenihaber.am-ի փոխանցմամբ՝ գործով առաջին քննությունը կայացել է հունիսի 21-ին՝ ժամը 10։00-ին։ Առաջին նիստում քննարկվել և դատարանի կողմից մերժվել են մեղադրող կողմի՝ ԺԴԿ-ի ներկայացուցիչների համար քաղաքականությամբ զբաղվելու արգելք կիրառելու և կուսակցության պետական ֆինանսավորման բանկային հաշիվներին կալանք դնելու պահանջները։
Որպես հաջորդ քայլ՝ մեղադրական եզրակացությունը կուղարկվի ԺԴԿ-ին, որպեսզի կուսակցությունը պատրաստի իր հակափաստարկները։ Այնուհետև մեղադրական եզրակացությունը կազմած Գերագույն դատարանի գլխավոր հանրապետական դատախազ Բեքիր Շահինը կներկայացնի մեղադրանքի իրավական հիմնավորումները, որոնք ևս կուղարկվեն կուսակցությանը՝ առարկությունների կամ հակափաստարկների համար։ Ինչին կհաջորդեն լսումները։
ժԴԿ-ի գործունեության դադարեցման պահանջով դատական գործը կքննի Սահմանադրական դատարանի 15 հոգանոց հանձնաժողովը։ Մեղադրող կողմի պահանջների բավարարման համար անհրաժեշտ կլինի հանձնաժողովի անդամների առնվազն 2/3-ի, այսինքն՝ 10 անդամի համաձայնությունը։
Եթե դատարանը բավարարի կուսակցության գործունեությունը դադարեցնելու պահանջը, վճիռը կուղարկվի Գերագույն դատարան և ԺԴԿ-ին և կհրապարակվի երկրի Պաշտոնաթերթում՝ այդպիսով ուժի մեջ մտնելով։ Դատարանը կարող է նաև վճռել հինգ տարի ժամկետով ԺԴԿ-ականներին արգելել զբաղվել քաղաքական գործունեությամբ, որևէ կուսակցություն հիմնել կամ անդամակցել։