«Առաջին լրատվական»-ի զրուցակիցն է Կառուցողական կուսակցության ղեկավար, խորհրդարանական ընտրություններին մասնակցած «Ազատ Հայրենիք» դաշինքի վարչապետի թեկնածու Անդրիաս Ղուկասյանը։
-Պարոն Ղուկասյան, ԿԸՀ-ն ամփոփել է ընտրությունների նախնական արդյունքները, ըստ որի՝ ՔՊ-ն ստացել է 53.92, «Հայաստան» դաշինքը՝ 21.04, «Պատիվ ունեմ»-ը՝ 5.23 %։։ Ինչպե՞ս եք գնահատում արձանագրված արդյունքները։ Արդյոք քաղաքական ճգնաժամը կարո՞ղ ենք լուծված համարել, թե ոչ։
–Ընտրությունների վերաբերյալ «Ազատ Հայրենիք» դաշինքը հայտարարությամբ հանդես կգա իր գնահատականով այսօր երեկոյան։ Պարույր Հայրիկյանը երեկ ակնարկեց, որ նախապատրաստում ենք համապատասխան հայտարարություն։ Դեռևս վաղ է համարել, որ ընտրություններն ավարտված են, որովհետև այս պահի դրությամբ պարզ չէ՝ ով է ճանաչել այս ընտրության արդյունքները, բացի ՔՊ կուսակցությունից։ Որևէ քաղաքական ուժ ճանաչե՞լ է դա, որևէ մեկը իր գոհունակություն հայտնե՞լ է քվեարկության արդյունքի վերաբերյալ։ Մենք գտնում ենք, որ իրավիճակը հարկավոր է գնահատել՝ ամփոփելով այն բոլոր տեղեկությունները, որ մենք ունենք ընտրախախտումների վերաբերյալ և դիտորդների գնահատականները հաշվի առնելով՝ մենք մեր կարծիքը կհայտնենք։
-Այնուամենայնիվ, եթե մնացած երկու դաշինքները վերցնեն մանդատները, ճգնաժամը կլուծվի՞, թե կխորանա։
–Այսօր շատ կարևոր է «Հայաստան» դաշինքի դիրքորոշումը, իրենք կվերցնե՞ն մանդատները և կհաստատեն այս ընտրությունները, թե իրենք կգնան անվավեր ճանաչելու ճանապարհով և չեն վերցնի մանդատները։
-ԿԸՀ նախագահ Տիգրան Մուկուչյանը ասում է, որ քաղաքական ուժերի՝ մանդատներից հրաժարվելու տարբերակ օրենքը չի նախատեսում։
–Խորհրդարանը չի կարող ձևավորվել մեկ քաղաքական ուժով։ Եթե Հայաստանում ձևավորվի խորհրդարան մեկ քաղաքական ուժով, ապա այս ընտրությունների արդյունքը և քաղաքական բովանդակությունը կհավասարվի զրոյի։
Նիկոլ Փաշինյանը ուզում էր քվե ստանալ, որպեսզի Ադրբեջանի հետ Ռուսաստանի հովանու ներքո կնքեր եռակողմ պայմանագիր և տարատեսակ այլ պայմանագրեր, և այսօր Ռոբերտ Քոչարյանի և Սերժ Սարգսյանի դիրքորոշումից է կապված՝ նրանք Նիկոլ Փաշինյանին նման հնարավորություն կընձեռե՞ն, թե ոչ։ Եվ դրանից է կապված Հայաստանի ապագան։ Հայաստանը կլինի ռուս-թուրքական տանդեմի ներքո Ադրբեջանի հետ համերաշխ ապրող պետություն և տարածք կոմունիկացիաների ազատ գործունեության համար, Հայաստանը կմոռանա իր զոհված զավակներին, Հայաստանը կընդունի կապիտուլյացիան, թե՞ Հայաստանն այդ ամենին դեմ կկանգնի։ Այսօր կա երկու քաղաքական գործիչ, ումից դա կախված է՝ Ռոբերտ Քոչարյանը և Սերժ Սարգսյանը։ Եթե իրենք չընդունեն մանդատները և հրաժարվեն այս խորհրդարանում մասնակցելուց, Նիկոլ Փաշինյանի սարքած այս քաղաքական տեխնոլոգիայով իրականացված սպառանալիքով, հանրությանը ահաբեկելով, քաղաքացիական պատերազմով շանտաժի ենթարկելով, այդ թվում միգուցե այլ խախտումներով, դեռ ամփոփվում են տվյալները։ Այսօր իսկապես վճռական դեր կարող են խաղալ Ռոբերտ Քոչարյանը և Սերժ Սարգսյանը, և իրենց որոշումից պարզ է լինելու Հայաստանի վիճակը։ Եվ այն, որ այս քվեարկությունն ամբողջ աշխարհում ընկալվելու է որպես հայերի կողմից կապիտուլյացիայի ճանաչում և Արցախից հրաժարում, միանշանակ այդ բովանդակությունն այդպես է մեկնաբանվելու միջազգային հանրության կողմից։ Ինչպես դրան հակադրվել, մենք հիմա մշակում ենք գործողությունների համապատասխան պլան, որովհետև բնականաբար այն ուժերը, որոնք կապիտուլյացիային դեմ են եղել և այս ամենի ընթացքում դրան հակադրվել են, այն, ինչ մեզ մատուցեցին ԿԸՀ-ից, առանձնապես հուզված չենք և պայքարը շարունակելու ենք։
-Եթե նույնիսկ այս երկու դաշինքները չվերցնեն մանդատները, նորից նոր ընտրություննե՞ր են նշանակվելու։
-Այդ դեպքում կլինեն նոր ընտրություններ։
-Եվ հանրությունը նորից կընտրի ՔՊ-ին։
-Պետք է հասկանալ՝ մարդիկ ինչու քվեարկեցին ՔՊ-ին, մարդիկ կո՞ղմ են Հայաստանի կապիտուլյացիայի՞ն, մարդիկ ուզում են հրաժարվել մեր զոհված զինվորների թափած արյունի՞ց, հանձնում են այդ ամենը Ադրբեջանին, Ռուսաստանին և Թուրքիային, սա՞ է մեր ժողովրդի դիրքորոշումը։ Այսօրվա քվեարկությունը կարող է մեկնաբանվել միայն այդ ձևով, որ հայ ժողովուրդը դեմ է երկրի զարգացմանը, արտասահմանյան ներդրումներին, նոր աշխատատեղերին և ուզում է հլու-հնազանդ ընդունի կապիտուլյացիան, որը մեզ պարտադրվել է ուժով և մեր զոհված հայրենակիցների պատիվը, արյունը, այդ հիշողությունը և պատասխանատվությունը զոհվածների առջև չի ընդունելու։ Ես չեմ կարծում, որ մեր հանրությունն իսկապես այդ աստիճանի ահաբեկված է, որ արդեն ձեռք է քաշել սեփական երկրից, և այդ առումով, ամեն ինչ նոր է սկսվում։ Ինձ չի թվում, որ Նիկոլ Փաշինյանի հայտարարությամբ, որ իրենք հաղթել են, քաղաքական գործընթացներն ավարտվում են։ Բոլոր այն հարցերը, որոնք կանգնած են եղել երկրի առջև, այն եղանակով, ինչպես որ Նիկոլ Փաշինյանը մատուցեց, որ մտադիր է լուծել այդ խաղաղության դարաշրջանը ներկայացնելով, այդ ամենը լրջագույն պրոբլեմներ կբերեն, և նա այդ դիմադրությունն իր մաշկի վրա շատ արագ կզգա, երբ հայերի կարգավիճակը կհավասարաեցվի ճանապարհի կողքին արևածաղիկ վաճառող ազգի կարգավիճակին, շատերը կմոռանանբ իրենք ինչպես են քվեարկել։