Հայաստանը Ռուսաստանի հետ լավ հարաբերությունները կպահպանի անկախ այդ երկրում նախօրեին անցկացված արտահերթ խորհրդարանական ընտրությունների վերջնական արդյունքներից, ТАСС-ի փոխանցմամբ, նշել է ՌԴ Դաշնությունների խորհրդի միջազգային հարցերի կոմիտեի նախագահի առաջին տեղակալ Վլադիմիր Ջաբարովը:
«Ռուսաստանը Հայաստանի ռազմավարական գործընկերն է: Հայ ժողովուրդը գիտի, որ այն վստահելի ու հավատարիմ ընկեր է, և Հայաստանիհամար ամենամոտը»,-ասել է նա:
Ըստ նրա՝ գլխավորն այն է, որ Հայաստանում պահպանվի հանգստությունն ու կայունությունը, որպեսզի քաղաքական դիմակայությունը չտեղափոխվի փողոց: «Մենք հիշում ենք, թե ինչպես տեղի ունեցան Բելառուսի նախագահ Ալեքսանդր Լուկաշենկոյի նախագահական ընտրությունները, ինչպես հետագայում զարգացան իրադարձությունները. խռովություններ հրահրվեցին, արդյունքում առճակատումը տևեց մի քանի ամիս: Հուսով ենք, որ Հայաստանում ամեն ինչ կանցկացվի ժողովրդավարական սկզբունքների հիման վրա», – հավելել է Ջաբարովը:
Նրա խոսքով, Ռուսաստանի համար կարևոր է, որ Հայաստանը մնա ՀԱՊԿ-ի հավատարիմ գործընկերը, ԵԱՏՄ անդամ երկիր: Վլադիմիր Ջաբարովը կարևոր է համարել նախորդ տարվա նոյեմբերից հետո երկրի տնտեսության վերականգնումը: «Կարծում եմ, որ այս համատեքստում մենք կողջունենք ՀՀ կառավարության ցանկացած խաղաղ նախաձեռնություն»,-նշել է նա: