Վաշինգտոնի կողմից Կիևին տրամադրվելիք ռազմական օգնության դադարեցման մասին տեղեկությունը չի համապատասխանում իրականությանը։ Այս մասին հայտարարել է Սպիտակ տան մամուլի քարտուղար Ջեն Պսակին։
«Միտքն առ այն, որ մենք դադարեցրել ենք Ուկրաինայի օգնությունն անվտանգության ոլորտում, աբսուրդային է։ Անցած շաբաթ՝ ԱՄՆ-ՌԴ գագաթնաժողովի նախաշեմին, մենք 150 մլն դոլար ծավալի օգնության փաթեթ ենք տրամադրել անվտանգության ոլորտում, ներառյալ մահաբեր բնույթի»,-ասված է հայտարարության մեջ։
Պսակին հստակեցրել է, որ ներկայում ամերիկյան իշխանությունները փոխանցել են ողջ գումարը, որը հատկացվել էր Կոնգրեսի կողմից անվտանգության ոլորտում Ուկրաինային օգնություն ցուցաբերելու նախաձռնության շրջանակում։
Բացի այդ, Սպիտակ տան ներկայացուցիչը հայտնել է, որ Վաշինգտոնը պատրաստել է պահուստային միջոցներ Ռուսաստանի՝ Ուկրաինա հետագա ներխուժման դեպքում գործի դնելու համար։
«Նախագահ Բայդենն ուղիղ ասել է նախագահ Պուտինին, որ մենք հաստատակամորեն աջակցում ենք Ուկրաինայի ինքնիշխանությանն ու տարածքային ամբողջականությանը»-եզրափակել է Պսակին։
Հիշեցնենք, որ երեկ Politico պարբերականը տեղեկություն էր հրապարակել այն մասին, որ ԱՄՆ-ը ժամանակավորապես դադարեցրել է Ուկրաինայի համար նախատեսված 100 մլն դոլարի ռազմական օգնության փաթեթը, որը ներառում է մահաբեր սպառազինություն։
