Հորդանան գետի արևմտյան ափում իսրայելցի զինվորականների հետ բախումներում տուժել է 386 պաղեստինցի։ Այս մասին հայտնում է Anadolu-ն՝ հղում անելով Կարմիր Մահիկի պաղեստինյան ներկայացուցչության հայտարարությանը։
Նշվում է, որ օգնություն է ցուցաբերվել 55 մարդու, ովքեր վնասվածքներ էին ստացել ռետինե ծածկույթով փամփուշտներից, և ևս 286-ի, ովքեր տուժել էին արցունքաբեր գազի կիրառումից։ Լուսաձայնային նռնակների կիրառման հետևանքով 38 մարդու մոտ այրվածքներ են եղել, 7-ի մոտ՝ վնասվածքներ։ Նրանցից 3-ը կամավորներ են շտապօգնության բրիգադից և 3 լրագրողներ։
Մայիսի սկզբին Պաղեստինի և Իսրայելի միջև կոնֆլիկտը սրվել էր։ Իսրայելի իշխանությունները սկսել էին Արևելյան Երուսաղեմից տեղահանել արաբ ընտանիքներին, ինչը հանգեցրել էր անկարգությունների։ Մայիսի 10-ին իրադրությանը միջամտել էր Գազայի հատվածը վերահսկող արմատական ՀԱՄԱՍ շարժումը։ Կողմերը հրթիռային հարվածներ էին փոխանակել, ինչն ավարտվել է հրադադարի մասին պայմանավորվածության ձեռքբերմամբ։
